Li gorî gotinên malbat û şahidan, polîsan di saetên sibehê de, derdora 04.00’an, avêtin ser malê. Enes Giyas Leyla ti berxwedan nîşan neda. Di kêliya ku wî destûr xwest da ku hevjîna wî serê xwe bigire, polîsê tîmên taybet gule berdan, û Leyla li ber çavên zarokên xwe jiyana xwe ji dest da.
Xizmên wî angaşt kirin ku polîsan, piştî ku fêm kirin ku ew çûne navnîşana şaş, Giyas Leyla li erdê birîndar hiştin. Di rapora yekem a tibî ya ku li Tirkiyeyê hate amadekirin de, sedema mirinê wekî “parçeya şarapnelê” hate destnîşankirin. Lê di rapora duyemîn a li Sûriyeyê de hate gotin ku mirin ji ber ” jêçûna xwînê” pêk hatiye. Li gorî malbatê, ev nakokî nîşan dide ku tê xwestin bûyer were nixumandin.
Mehdî Davud, Serokê Yekîtiya Saziyên Sivîl ên Sûriyeyê, ragihand ku: Waliyê Hatayê û Qeymeqamê Dortyolê serdana malbatê kirine. Wezareta Karên Hundir tîmeke lêkolînê şandiye, û polîsê ku gule berdaye, ji kar hatiye dûrxistin û termê Leyla li Sûriyeyê hate definkirin.
KOMELEYA MAFÊN MIROVAN (ÎHD) LÊPIRSÎNEKE SERBIXWE XWEST
Hevserokê Şaxa ÎHD’ê ya Hatayê, Mursel Tonguç Salmanoglu, xwest ku bûyer yekser û bi awayekî serbixwe bê lêkolînkirin û li ser berpirsiyaran dest bi pêvajoya îdarî û darazî bê kirin. Salmanoglu diyar kir ku divê prosedûrên operasyonan li gorî standardên mafên mirovan werin kirin û wiha got:
“Mafê jiyanê mafekî ku nayê vegerandin e. Mirinên di operasyonên di bin kontrola dewletê de wekî xeletiyeke asayî nayên dîtin. Sersaxiyê ji malbata Enes re dixwazim, em ê şopdarê bûyerê bin.”
