Navenda Çavdêriya Mafên Mirovan a Sûriyeyê (SOHR) ragihand ku malbatên qurbaniyan hatine agahdarkirin ku biçin cenazeyan wergirin û belgeya mirinê îmze bikin, bêyî ku sedem an şert û mercên mirinê werin aşkerakirin.
Li gorî SOHR’ê, rayedarên hikumeta demkî cenazeyên 3 kesan radestî malbatên wan ên li gundewarên Efrînê kirine, di nava wan de mêrekî 49 salî heye ku di 10’ê Çileyê de dema ku bi şêniyan re ji taxa Şêxmeqsûd derdiket, hatibû girtin. Ew ji gundê Hobka yê navçeya Raco ya Efrîn ye.
SOHR’ê diyar kir ku 3 cenaze bêyî ku destûr bidin malbatan li wan binêrin, radestî wan kirina û “Ewlekariya Giştî” ya hikumeta demkî malbat neçar kirine ku belgeyên mirinê îmze bikin.
“Ewlekariya Giştî” ya hikumeta demkî roja 22’yê Çileyê agahî da malbata kesekî ji gundê Gurzêlê yê navçya Bilbilê ku biçin belgeya mirina kurê xwe îmze bikin. Kesê kuştî ji aliyê çeteyên hikumeta demkî ve di dema êrişa li ser taxa Şêxmeqsûd de hatibû girtin.
SOHR’ê diyar kir ku hejmara şehîdan ji roja yekem a êrişên li ser taxên bajarê Helebê ve gihaştiye 111’an.
