Nexweşxaneya dewletê ya li bajarê Mrauk U şeva Çarşemê bi balafireke şer hate bombekirin. Ji wezîfedarên alîkariya mirovî yên li herêmê Wai Hun Aung got, “Rewş gelekî metirsîdar bû. 31 kes mirin, em bi fikar in ku hejmara qurbaniyan zêdetir bibe.” Berdevkê cûntayê bersiv neda pirsên li ser bûyerê.
Li gorî çavdêran, artêşa ku sala 2021’ê di darbeyê dest danî ser desthilatdariyê û dawî li tecrûbeya demokratîk a deh salan a li welêt anî, sala dawî êrişên hewayî zêde kir.
Cûntayê diyar kir ku wê 28’ê Kanûnê hilbijartinên giştî lidar bixe û îdîad ike ku ev yek rêya derketina ji nava şer e. Lê belê komên serhildêr ragihandin ku wê li herêmên kontrol dikin hilbijartinê asteng bikin.
Gelek welat û Neteweyên Yekbûyî, hilbijartinên ji aliyê cûntayê ve bêne kirin bi tundî rexne dikin. Çîn îdîa dike ku ev pêvajo dikare tevkariyê li “jinûve pêkanîna aramiya civakî” ya li Myanmarê bike.
Tê gotin, dorpêça artêşê ya li eyaleta Rakhine (Arakan) dibe sedema birçîbûneke cidî. Ev tespît ji aliyê Bernameya Xurekê ya Cîhanê ve hate parvekirin.
