Hêzên hikumeta veguhêz a Sûriyeyê li derdora taxên Şêxmeqsûd û Eşrefiyê rêbendên kontrolê yên nû danîne. Hat diyarkirin ku leşkerên hikumeta veguhêz şêniyên herdu taxan ên ku di rêbendan re derbas dibin asteng dikin û heqaretê li wan dikin.
Şêniyeke ku ji nexweşxaneya Razî ya li herêmên di bin kontrola hikumeta veguhêz de vedigeriya mala xwe ya taxa Şêxmeqsûd got ku leşkerên li rêbendên kontrolê yên nû hatine danîn gotinên nebaş ji wê re kirine û her yek derbasî taxê dibe, ji wan re dibêjin “xinzîr” anku beraz.
Welatî diyar kir ku leşker telefonên welatiyan kontrol dikin û înternetê pê ve girê didin ku cihê wan bizanin. Ev yek li dijî taybetmendiyên takakesî û azadiya geştê binpêkirineke eşkere ye.
Li gorî îfadeya welatî, leşkeran zor li wê kirine ku çenteya xwe ya tê de ji bilî belgeyên tibî yên çûyîna nexweşxaneyê tîştek nîn bû, ji wan re veke û ev jî wekî binpêkirina taybetmendiya jinan bi nav kir.
Li gorî çavkaniyan, ew rêbendên kontrolê yên nû ji aliyê çekdarên Firqeya 60’an û Firqeya 72’yan ên Wezareta Parastinê ya hikumeta veguhêz a Sûriyeyê ve, hatine danîn.
