Meclisa Malbatên Şehîdan a Qamişloyê ji bo şervanê Hêzên Sûriyeya Demokratîk (QSD) şehîd Goran Qamişlo (Ehmed Şêxmûs) ku di 2`yê Mijdarê de li Qamişloyê şehîd bûbû, merasîmeke oxirkirinê organîze kir. Her wiha ji bo şervana Yekîneyên Parastina Jin (YPJ) şehîd Zeyneb Têkoşîn (Viyan Xelîl) ku di 8`ê Kanûna 2024`an de li bajarê Minbicê şehîd bûbû, merasîma xiyabî hat lidarxistin.
Merasîma Şehîd Goran Qamişlo û Zeyneb Têkoşîn li Pakrewangeha Şehîd Delîl Sarûxan a li Qamişloyê bi amadebûna bi sedan şêniyên bajarê Qamişlo û gundewarên wê, endamên Meclisa Malbatên Şehîdan, sazî, dezgehên Rêveberiya Xweser û civaka sivîl li dar ket.
Di merasîmê de hevserokê Meclisa Malbatên Şehîdan û Birîndarên Şer Rêzan Gulo axivî û şehîdên Şoreşa 19`ê Tîrmehê bi bîranîn û got: “Ev destekeftiyên heyî hemû bi saya şehîdan me bi dest ketine, malbatên her du şehîdan ji malbatên destpêkê ne ku di şoreşê de cih girtiye.”
Rêzan Gulo di dawiya axaftina xwe de soza daomandinn û pêkanîna armancên şehîdan da.
Piştre ji Fermandariya Meclisa Leşkerî ya Qamişloyê Nezîr Sofî axivî û sersaxî ji malbatên şehîdan re xwest û got: “Bila dilê dayikên şehîdan şad be, em ê armanca şehîdan pêk bînin.”
Paşê meta şehîd Zeyneb Têkoşîn, Şaha Xelîl jî axivî û destnîşan kir ku wan weke malbat bi bawerî û îrade fikr û felsefeya Rêber Apo hilbijartine û got: “Her em dibêjin, di hemû rewşan de em qet dest ji şoreşa xwe bernadin, em qet xiyanetê li ser vê xakê qebûl nakin. Heta gihandina Sûriyeyeke demokrat em ê tê bikoşin.”
Her wiha Sadiq Badiyan (Sadiq Hesen) ku piştî 30 salan ji girtîgehên dewleta Tirk derketiye, axivî û destnîşan kir ku Şoreşa 19`ê Tîrmehê ji bo hemû Kurdan bûye îlhamek û her ferdek li Kurdistanê dixwaze tev li şoreşê bibe.
Dayika şehîd Goran Qamişlo, Îlham Şêxmûs jî axivî û soz da ku li ser rêya kurê xwe û hemû şehîdên Şoreşa 19`ê Tîrmehê berxwedana xwe bidomîne.
Piştî axaftinan wesîqeyên şehîdan hatin xwendin û radestî malbatên wan hatin kirin û şehîd spartin axê.
Wê sibe merasîma sersaxiyê ji bo şehîd Goran Qamişlo û Zeyneb Têkoşîn li ber Pakrewangeha Delîl Sarûxan bê lidarxistin.
