Bi sedan şêniyên Reqayê bi merasîmekê cenazeyê şervanê QSD’ê Ebdurehî El Şûeyb ê ku 9’ê Cotmehê de şehîd bûbû, li Pakrewangeha Şehîdan a li bajarokê Hikumiyê yê bakurê kantonê veşartin.
Ji bo gerîlayên HPG’ê Azad Minbic (Ednan Şewax) ku 29’ê Tebaxa îsal Cîlo Çarçela (Xelîl Suleyman) ku 4’ê Çileya îsal li Zapê şehîd bûne, şervanên QSD’ê Besam El Ebûd û Fîras El Reselan ku 8’ê Kanûna 2024’an li Minbicê şehîd bûne, merasîma xiyabî hat lidarxistin.
Piştî rêzgirtin û torana leşkerî ya şervanên QSD’ê hevserokê Meclisa Malbatên Şehîdan a Kantona Reqayê Ehmed El Şêx axivî. Ehmed El Şêx soza domandina rêya şehîdan da û got: “Bi saya şehîdan em jiyaneke rûmet dijîn. Em deynkarên wan in. Şehîd di dilê me de ne. Em soz didin ku em ê heta bidestxistina serketinê şopdarên rêya wan bin.”
Ji fermandarên Hêzên Komandos ên QSD’ê Ebdullah El Xemîs sersaxî ji malbatên şehîdan re xwest û wiha got: “Em bejna xwe li hemberî şehîdan ditewînin. Bi saya wan em bi azadî û rûmet dijîn. Van şehîdan zilm qebûl nekirin. Welatê xwe terk nekirin, lê di rêya azadî û wekheviyê de meşiyan. Sînor nas nekirin, li ku derê xetere hebûn parastin dikirin.”
Ebdullah El Xemîs di dawiya axaftina xwe de soza şopandina rêya şehîdan da.
Di merasîmê de endamê Kongreya Îslama Demokratîk şêx Hisên El Elî anî ziman ku “cihê şehîdan li cîhan û axîretê li ba Xwedê bilind e”.
Di dawiya merasîmê de nasnameyên şehîdan hatin xwendin û radestî malbatên wan kirin. Cenazeyê şehîd Ebdurehîl El Şueyb bi dirûşmên “Bi can bi xwîn em bi te re ne şehîd” veşartin.
