Merasîma îmhakirina çekan a li Şikefta Casenê ya li bejahiya Silêmaniyeyê, li gelek bajarên Kurdistan û Tirkiyeyê ji aliyê gel ve li ber ekranan bi baldarî, bi kelecan, hêvî û hestewariyê hate temaşekirin.
AMED
Li Amedê gelek kes li avahiya MEBYA-DER’ê li hev kom bûn. Girsey a gel ku bi saetan li merasîmê temaşe kir, hestewar bû. Dîmen bi çepik û dirûşman hate pêşwazîkirin. Dirûşmên ‘Bijî Serok Apo’, ‘Bijî berxwedana gerîla’ û ‘Şehîd namirin’ hate qîrîn. Hin jinan rondik barandin, xizmên şehîdan jî wêneyên şehîdan hildan. Serê sibehê jî li avahiya bajêr a DBP’ê girseya gel li hev kom bû û li merasîmê temaşe kir.
BISMIL Û XANA AXPAR
Li Bismil û Xana Axparê gel li mala xwe û li avahiyên partiyê merasîm şopand. Dayika Aştiyê Makbûle Akyuz ku eletrîk hate birîn bi telefonê li merasîmê temaşe kir û şahidî ji vê kêliya dîrokî re kir.
SÊRT
Li Sêrtê girseya gel li Salona Konferansê ya Denîz Poyraz li hev kom bû, di dema temaşekirina li dîmen de dirûşma ‘Bijî Serok Apo’ hate qîrîn. Bi taybetî dayikên ku ewladên xwe ji dest dan, di dema îmhakirina çekan de rondik barandin.
ÊLIH
Li Êlihê girseya gel a li avahiya MEBYA-DER’ê li hev kom bû, bi dirûşm û çepikan merasîm şopand. Dema ku çek hatin îmhakirin, jineke ciwan dît ku xizmeke wê di nava wan gerîlayan de ye ku çek îmha kir, lewma hestewar bû.
ŞIRNEX Û NAVÇEYÊN WÊ
Li navenda Şirnexê û navçeyên Cizîr, Hezex û Silopiyayê bi pêşengiya DEM Partî û MEBYA-DER’ê girseya gel li hev kom bû. Li Cizîrê Dayika Aştiyê Makbûle Demîr got, “Ji bo gelên Rojhilata Navîn rojeke dîrokî ye” û bang kir ku gavên siyasî bêne avêtin û sererastkirinên qanûnî bêne kirin.
STENBOL
Şêniyên li Stenbolê li avahiya DEM Partiyê ya bajêr li hev kom bûn. Beriya weşanê girseya gel bi baldarî bername şopand û bi kelecaneke mezin li merasîmê temaşe kir.
MÊRDÎN (QOSER)
Li navçeya Qoser a Mêrdînê bi pêşengiya MEBYA-DER’ê welatî li hev kom bûn û bi kelecan li merasîmê temaşe kir.
