Mîhrîcana Fîlman a Jinan a Nûjiyan ku ji hêla Kollektîfa Kezî ya Jinên Sînemager ve bi piştgiriya SîneJin a Rojava, Tevgera Çanda Jinên Hîlala Zêrîn, sînemagerên jin ên li Ewropayê û bi alîkariya Desteya Çandê ya Kantona Cizîrê hatiye birêxistinkirin, di roja xwe ya sêyemîn dewam dike.
Di çarçoveya bernameya îro de, li Navenda Çand û Hunerê ya Mihemed Şêxo ya li Qamişloyê semînera “Jinên sînemager, li paş kamerayê” ji aliyê derhênera ji Lubnanê Liyana Qesîr (Liana Kassir) û derhênera ji Siwêdayê Sûha Ezî ve hate dayîn.
Liyana Qesîr behsa fîlmê xwe yê bi navê ‘Derya û Pêlên Wê’ kir û destnîşa kir ku wê pir xwestiye Şoreşa 19`ê Tîrmehê ji nêz ve nas bike û got: “Di salên 1970`yî de li Lubnanê qada sînemayê bi pêş ket, wê demê derhênerên jin û mêr li kêleka hev xebat dida meşandin. Niha jî ez li cihê ku lê kar dikim cudahiyê nabînim, cudahiya di navbera fikra mêr û jinan de nabe mijar. Di nava xebatê de em hev temam dikin.”
Derhêner Sûha Ezî jî behsa belgefîlmê xwe yê bi navê ‘Çîroka Bîranîna Welat û Siyekê’ kir.
Li gorî bernameya ku hatibû belavkirin diviyabû saet di 15:00`an de li Navenda Çand û Hunerê ya Mihemed Şêxo belgefîlmê ‘The Desert Rocker’ a derhêner Mariam Ohanyan hatiba pêşandan, lê ji ber pirsgirêkên teknîk ev fîlm dê saet di 20:00`an de li Parka Azadî bê pêşandan.
Li kêleka pêşandana belgefîlmê navborî dê danê êvarê li Parka Azadî belgefîlmên ‘The Pasha My Mother and Paşao’ ya derhêner Nevine Gerits, kurtefîlmê ‘Zar û Zeman’ a Xecê Rêdûr, Mindaly Bilur a derhêner Sameeah Salih û ‘The Last Cowboy’ a derhêner Basma Sheren bên pêşandan.
Mîhrîcana Fîlman a Jinan a Nûjiyan dê heta 31`ê Gulanê dewam bike.
