Endamê Komîsyona Girtîgehê ya ÇHD a Stenbolê Ekrem Surer diyar kir ku rapor li ser agahiyên ji hevdîtinên bi girtiyên li Girtîgehên Hejmar 1 û 2 yên Kocaelî, Girtîgeha Tîpa F ya Edîrneyê, Girtîgeha Jinan a Bakirkoyê û Girtîgeha Ewlehiya Bilind a Karatepe ya Çorlûyê hatine wergirtin, hatiye amadekirin. Surer anî ziman ku gelek binpêkirinên mafan hatine tespîtkirin û got, “Li hin girtîgehan, di jimartina sibê û êvarê de tekmîl û hejmara li ser lingan tên ferzkirin.
Girtiyên/hikûmxwarên ku vê yekê qebûl nakin bi lêdan û cezayên dîsîplînê re rû bi rû dimînin. Rewşa girtiyên nexweş û hikûmxwaran her ku diçe xirabtir dibe û girtiyên nexweş û hikûmxwar nayên berdan. Şert û mercên hikûmxwarên ku cezayên muebbeta girankirî hatiye birîn nayên qebûlkirin. Ev rewşa heyî rêgeza wekheviyê ya Destûra Bingehîn û peymanên mafên mirovan ên hatine îmzekirin binpê dike. Divê demildest dawî li vê yekê were anîn û divê şert û mercên mirovî yên mafên hikûmxwaran têkeve meriyetê.”
Pirsgirêka girtîgehên tîpa çalê mîna li seranserê Tirkiyeyê li girtîgehên herêma Marmarayê jî binpêkirineke mezin a mafên mirovan e. Avakirina van girtîgehan li dijî rûmeta mirovan e, bêyî îradeya girtiyan wan sirgûn dikin û ev yek rê li sîstematîkkirina van binpêkirinên mafan vedike. Wezareta Dadê demek dirêj e li hember rojiya mirinê û grevên birçîbûnê yên li dijî girtîgehên tîpa çalê hatine destpêkirin nakeve nava liv û tevgerê. Divê demildest ji bo bicihanîna van daxwazan gav bên avêtin û divê girtiyan sewqî girtîgehên din bikin. Bi taybetî, tenduristiya Fikret Akar ê ku li Girtîgeha Ewlehiya Bilind a Çorlûyê ya ku li Herêma Marmarayê ye, gihîştiye qonaxeke krîtîk. Ji bo mafê jiyanê yê girtiyan were parastin divê demildest ev daxwaz bên qebûlkirin.”
Surer destnîşan kir ku biryarên Lijneya Îdare û Çavdêriyê yên astengkirina berdana girtiyan berdewam dikin û ev biryar ne “objektîf” e ûbinpêkirina mafên girtiyan ên weşan û ragihandinê jî berdewam dikin.
Endamê Komîsyona Girtîgehan a ÇHD a Stenbolê Naîm Emînoglû jî diyar kir ku çavên muxalefetên çepgir sosyalîst li girtîgehan e û heta ku binpêkirinên mafên mirovan bi dawî bibin ew ê têkoşîna xwe bidomînin.
