Hikûmeta demkî ya li Sûriyeyê, ragihand ku wan ji ber şewatên daristanan ên ku bandor li welêt kirine, ji Yekîtiya Ewropayê (YE) alîkarî xwestine.
Wezîrê Karûbarên Awarte û Karesatan Raid el-Salih, got ku wan ji bo têkoşîna vemirandina agir alîkariyê ji YE’yê xwestin e. Raid el-Salih got ku tê peyîn balafirên agirkujiyê ji Qibrisê bêne şandin û got ku tîmên ji Urdun, Tirkiye û Lubnanê jî beşdarî hewldanan vemirandina agir bûne.
5 HEZAR KES BANDOR BÛNE Û GUND HATIN VALAKIRIN
Ofîsa Neteweyên Yekbûyî ya ji bo Kordînasyona Karûbarên Mirovî (OCHA), ragihand ku agir ji %3’yê bêhtir ji daristanên Sûriyeyê wêran kiriye û hate gotin ku bandor li dora 5 hezar kesan kiriye. Hin gundên Lazkiyeyê hatin valakirin, lê ti qurbanî çênebûn.
Li gorî rayedaran germahiya zêde, bayên bihêz, erdê çiyayî û mayînên ji ber şer mayî hewldanên vemirandina agir zehmettir dikin. Wezîr Salih, diyar kir ku şevê agir li gundê Heseniyeyê dest pê kiriye, jin û zarok hatine tehliyekirin û got ku agir bi piştgiriya şêniyên herêmê hate kontrolkirin.
Rêxistina Xurek û Çandiniyê ya Neteweyên Yekbûyî (FAO), ragihand ku Sûriye bi şert û mercên avhewayê yên herî xirab ên 60 salan re rû bi rû ye.
