Federasyona Alevî Bektaşî (ABF), Federasyona Elewiyan a Tirkiyeyê (ADFE) û Weqfa Çandê ya Anatolî ya Haci Bektaş Velî li Cemxaneya Pîr Sûltan Abdal a li Sûltangaziyê bi dirûşma “Li Sûriyeyê Elewî têne qetilkirin” daxuyaniyek dan. Hevberdevkê Kongreya Demokratîk a Gelan (HDK) Alî Kenanoglû jî di nav de nûnerên gelek saziyan beşdarî daxuyaniyê bûn. Di dema daxuyaniyê de pankarta bi nivîsa “Li Sûriyeyê Elewî têne qirkirin” û dowîzên bi nivîsa “Ev sîstem ji Kerbelayê û vir ve xerabe ye”, “Em mafê welatîbûna azad dixwazin” hatin hildan. Di çalakiyê de dirûşma “Kujer HTŞ, hevkar AKP” hate qîrîn.
Endama Desteya Rêveberiyê ya Federasyona Alevî Bektaşî Sevîm Yalincakoglû daxuyanî da.
Sevîm Yalincakoglû destnîşan kir ku li Sûriyeyê zilm û komkujî dewam dikin û got, “Ya ku niha tê serê Elewiyan Kerbela ye. Yezît heman yezît e, mezlûm jî heman mezlûm e. Doh li Lazqiye, Hama û Hûmsê gel mirin da ber çavên xwe û li dijî zilmê daket qadan. Em piştgiriya gel dikin. Em bi gelên mezlûm ên li Sûriyeyê re ne. Kujer Colanî û çeteya wî divê tavilê bê darizandin. Tundî û kuştina mirovên bêguneh ji nedîtî ve neyên. Bibin dengê jin û zarokan ên hatin qetilkirin, Colanî rewa nekin.”
