Li Rojhilata Navîn ruhê netewa demokratîk di paradîgmaya Rêber Apo de bedena xwe peyda kir, di nava refên Partiya Karkerên Kurdistan (PKK) de ku bi roniya fikrê Rêber Apo ve hatiye damezirandin roja îro ji her aliyê cîhanê, ji her netewî beşdariya ciwanan heye. Ji Netewa Ereb gerîlayê HPG’ê Şivan Hesekê qala bandoriya xwe ji Tevgera Apoyî dike, her wiha qala mezinahî û bandoriya ramanên Rêber Apo dike. Gerîla Şivan dibêje ku Rêber Apo ev tekoşîn ne tenê ji bo çareserkirina doza Kurd daye meşandin, ji bo azadiya me hemû gelan e. Lewra em ê heya kêliya dawî ji jiyana xwe di nava xebat û berxwedaniyê de bin ji bo bi ser xistina vê doza pîroz.
Gerîlayê ji netewa Ereb Şivan Hesekê wiha axivî: “Ji ber ku ji hevalên şehîd gelek bandor bûm, tevlî partiyê bûm. Piştî tevlîbûnê min felsefe û bîrdoziya Rêber Apo xwend û bi têgihîştina neteweya demokratîk re di keseyeta min de guhertinên bingehîn çêbûn. Rêber Apo bi neteweya demokratîk re li Rojhilata Navîn yekitiya gelan û aştiya civakî ava dike.
Fikrên Rêber Apo dîrokî ne û em li ser wî esasî pêş dikevin. Ji ber neteweya demokratîk ji bo hemû gelan e, bi tevlîbûna gelan pêşketinên girîng çêdibin.
Niha em li çiyayên Kurdistanê ne. Jiyana gerîla gelek zehmet e, lê bi hevaltî û berxwedanê re jiyan hêsan û bedew dibe. Hatina vir bi têgihîştina rastiyê ve girêdayî ye. Rastiya ku em tînin ziman veşartîbû. Pergala Sûriyê li ser gelan pir zext çêdikir û nedihîşt ku Kurd, Ereb û Suryan li ser çanda xwe jiyan bike. Lê bi fikra Rêber Apo re hemû gel hatin gel hev û jiyana hevpar ava kirin. Her kes li gorî rastî û çanda xwe tevlî dibe û yekîtiya heyî tu çand û cudahî nahêlîne.
Em ji pêvajoyekî girîng derbas dibin û gavên dîrokî davêjin. Gelek hevalên Ereb li vir in û em bi hevalên vir, li hemberî dagirkeriya dewleta Tirk li berxwe didin. Dewleta Tirk a dagirker dixwaze fikrê Rêber Apo ji holê rake. Lê em bi israr in ku vê paradîgmayê ser bixin û em îsal dikevin 27’emîn sala komploya navnetewî. Em ê îsal komplo bi temamî ji holê rakin.
Rêber Apo li Îmraliyê berxwe dide û ev berxwedana Rêber Apo ji hemû gel û civakan re dibe moral û riya rastiyê.”
