Li Bakur û Rojhilatê Sûriyeyê di Dewreya Perwerdeyê ya Şehîd Serkêş Riha ya Akademiya Şehîd Rizgar Wan a gaziyên şer de bi tehlîlên şexsî nirxandindên girîng hatin kirin.
‘WÊ HEVALÊN ME ERKÊN XWE YÊN DEMÊ PÊK BÎNIN’
Endama Federasyona Gaziyên Bakur û Rojhilatê Sûriyeyê û gaziya şer Şîlan Kobanê ya weke komîsyon tevlî perwerdeyê bû têkildarî mijarê axaftina vekirinê kir.
Şîlan Kobanê têkildarî tehlîlên şexsî diyar kir ku dema li ser parêzname û Manîfestoya Aştî û Civaka Demokratîk perwerdeyê dibînin, kesayeta xwe jî tehlîl dikin û got, “Ya girîng ew e mirov kesayeta xwe li gor Manîfestoya Aştî û Civaka Demokratîk çêbike. Dîsa pir hêja ye mirov li ser vî esasî xwe bigihîne zanebûna hestên polîtîk, weke netewe dersan ji dîroka xwe derxe û bi aqilê Kurdên nûjen têkoşîn bike. Fikir û felsefeya Rêber Apo ji bo me bû ronahî. Em ji tarîtiya salên dirêj derbasî serdemeke nû kirin. Pêwîst e, em jî xwe zana bikin û pir aktîf bibin da ku azadiya fizîkî ya Rêbertiya xwe misoger bikin. Pir zelal diyar dibe hevalên me yên xwe bi fikir û bîrdoziya Rêber Apo gurçûpêç kirine wê kesayeta xwe pêş bixin û erkên xwe yên demê pêk bînin.”
Gaziya şer Şîlan Kobanê anî ziman ku weke jin, gel û gaziyên şer deyndarên Rêber Apo ne û wiha dewam kir, “Divê em layiqî ked û têkoşîna Rêber Apo bin. Em careke din soz didin Rêberê xwe ku heya dawiyê em ê ji bo azadiya gelên xwe têkoşîn bikin.”
‘EM JI HEVALTIYA XWE BAWER IN’
Gaziyên şer jî têkildarî tehlîlên şexsî di nirxandinên xwe de bi rengekî pir vekirî û rehet qala kesayeta xwe kirin û gotin: “Di nava civakê de ti kes newêre qala şaştî û lawaziyên xwe bike. Wiha li mirovan hatiye ku xwe ji hevdu diparêzin. Lê weke gaziyên şer em pir rehet kesayeta xwe tînin ziman û ji hevdu alîkariyê dixwazin. Sedema wê jî ew e Rêber Apo hişt ku em ji hevdu bawer bikin û alîkariyê ji hev bixwazin. Em ji hevaltiya xwe pir bawer in. Lewma em kesayeta xwe digirin dest û dinirxînin. Rexneyên hevalên me û şîroveyên wan ji mirov re dibin perspektîf û rê nîşanî me didin.”
