PKK’ê wê sibê li ser banga Rêber Apo li bajarê Silêmaniyê merasîma çekberdanê li dar bixe. Şandeyên ji bo tevlî merasîmê bibin, ji bajarên cuda ên Tirkiye û Kurdistanê bi rê ketin, li navçeya Cizîr a Şirnexê li hev civiyan.
Di şandeyê de tevî Hevserokê Giştî yên DEM Partiyê Tulay Hatîmogullari û Tuncer Bakirhan, Hevserokên Giştî yên DBP’ê Çîgdem Kiliçgun Uçar û Keskîn Bayindir, Hevserokên Giştî yên OHD’ê Ekîn Yeter û Serhat Çakmak, endamên Meclîsa Dayikên Aştiyê û parlementerên DEM Partiyê, 150 kes cih digirin.
Hevserokê Giştî yê DEM Partiyê Tuncer Bakirhan di hevdîtina li derketina Cizîrê de axivî û bersiv da pirsên rojnamevanan.
Bakirhan wiha got: “Em pir bi heyecan in. Ji bo bidawîbûna pêvajoya pevçûn û tundiyê ku beriya 50 salan destpê kir, gavekî pir girîng tê avêtin. Ev pêvajo hem dîrokî û hem jî pir hêja ye. Her kesên li vir amade wê şahidiya wê kêliyê bikin. Ev geşedan wê bibe dîrok. Yên şahidî jê re bikin jî cihê xwe yê dîrokî bigirin. Ev destpêkek e û berpirsyariyekî mezin dikeve ser milê me hemûyan. Ger em vê berpirsyariyê bi cih bînin, em ê êdî ne darbestên ciwanan lê aştiyê hilbigirin. Em ê weke DEM Partiyê tişta ku bikeve ser milê me pêk bînin. Em li bende ne ku her kes erka xwe bi cih bîne.”
‘AŞTÎ WÊ RIHÊ SIRRI SUREYYA ONDER ŞA BIKE’
Birayê Endamê Şandeya Îmraliyê Sirri Sureyya Onder, Alî Fuat Onder jî di şandeyê de cih digire.
Onder hestên xwe bi vî rengî anî ser ziman: “Em minetdarî her kesên ku keda wan çêbû ku pêvajo were vê astê ne. Îdialê herî mezin a jiyana siyasî ya birayê min aştî bû. Aştî wê rihê wî şa bike. Ji bo her kesên li vî welatî aştî wê pir hêja be. Hêvî dikim ku her tişt baş bibe. Yekane daxwaza min e ku em aştiya mutleq bi hev re bibînin.”
‘XEYALA 50 SALAN PÊK TÊ’
Mele Kasim Yîgît ê hatibû verêkirina şandeyê jî wiha got: “Min 50 sal ev xewn dît. Êdî hêviya me hêdî hêdî pêk tê. Heta îro berdêlên mezin hatin dayîn. Niha jî pêkanîna xeyala me ya 50 salan heyecanekî mezin di me de çêdike. Em bawerî bi keda Birêz Ocalan tînin. Şande bi hêviyên mezin diçe Başûr. Hêvî dikim ku bi vegera wan re hemû gel nefesê bigirin.”
‘DAYIK BI SALAN IN AŞTIYÊ DIXWAZIN’
Berdevka Meclîsa Dayikên Aştiyê ya Silopiyayê Asya Tay jî ev peyam da: “Em her kesên ku ji bo aştiyê bi rê dikevin, silav dikin. Divê peyama aştiyê ku wê bi banga Rêbertiyê re were dayîn ji aliyê hemû cîhanê ve rast were fêmkirin. Di nava kesên bi rê ketin de dayik jî hene. Ev dayik bi salan in aştiyê dixwazin. Ji bo bigihin zarokên xwe diçin. Rêya wan vekirî be. Çûyîna wan bi aştiyekî bi rûmet tacîdar bibe.”
Şande bi tilîliyan ber bi Deriyê Sînorê Habur a ser Silopiyayê bi rê ketin.
