Rûniştina 8’emîn a jinûvedarizandina Hevşaredarê Bajarê Mezin ê Wanê Abdullah Zeydan a bi îdiaya “alîkariya rêxistinê kiriye” li 5’emîn Dadgeha Cezayê Giran a Amedê dest pê kir. Abdullah Zeydan beşdarî rûniştinê nebû. Parêzer Mahsûnî Karaman berî demekê ji dozê vekişiyabû û parêzer Mehmet Emîn Aktar weke parêzer tevlî dozê bû. Aktar daxwaza wextî kir.
Mehmet Emîn Aktar di dema parastinê de bertek nîşanî biryara heyeta dadgehê da ku ji bo girtina tedbîrên “ewlehiyê” talîmat daye Midûriyeta Ewlehiyê ya Bajarî. Parêzer Mehmet Emîn Aktar wiha axivî: “Bêyî ku hûn li benda min bin ku ez parastinê bikim, we biryara xwe duhî bi wê talîmatê daye. Parastin mafê min û muvekkîlê min e. Ev hewcedariya darizandina adilane ye. We bi nedana wextî ev maf binpê kir.”
Aktar wiha berdewam kir: “Helwesta we ya îro darizandina adilane û nealîgiriya we binpê kir. Ez ji ber vê yekê dadegehê red dikim.”
Akrar daxwaza redkirina dadgehî kir. Lê dadgehê ev daxwaza wî red kir. Aktar li ser vê yekê got: “Heger wexteke maqûl neyê dayîn hem darizandina adilane hem jî mafê parastinê dê were binpêkirin.”
Dadgehê 3 sal û 9 meh cezayê girtîgehê li Hevşaredarê Bajarê Mezin ê Wanê Abdullah Zeydan birî.
