Di her demeke dîrokî de bûyerek an jî kesayetek xwe didin pêş. Dibin sedema destpêkeke nû, gaveke nû, sondeke nû. Dibe nûnerê hevrêtî, berxwedan û sekna bi rûmet. Dibin rêberê pêşengên şerê gerîla. Fermandar Botan, Zinarîn, Serhildan, Argêş, Delal, Ozgur û Baz 15’ê Tîrmehê Girê Sor kirin keleha berxwedanê û ruhê berxwedanê yê Kemal û Hayriyan careke din derbasî ser dika dîrokê kirin.
Dewleta Tirk a dagirker 21’ê Nîsana 2021’ê bi konsepta êrîşa nû li ser qada Avaşînê dest bi operasyoneke berfireh kir. Vê operasyonê li Mamreşo, Şehîd Serdar û tevahiya qadê dewam kir. Dewleta Tirk a dagirker di destpêka Hezîranê de piştî ku li Mamreşo, Şehîd Serdar û çeperên din nekarî encamê bi dest bixe, berê xwe da herêma Basyayê.
Ji komeke gerîla rizgar bû û kete destê komeke din a gerîla. Ji ber ku Avaşîn li wan bûbû mîna dojehê û her roj di agirê dojehê de dişewitîn. Şervanên ku fermandar Botan, Zinarîn û Serhildan pêşengî ji wan re dikirin, xwe ji bo berxwedana demê amade kirin. Çepera wan tunelên Girê Sor, çekên wan jî bawerî û îradeya wan bû. Wan dixwestin Kurdistanê ji leşkerên Tirk ên ji bo dagirkirinê hatine bikin goristan. Her yekî ji wan mîna generalekî şer bi rê ve birin û bêhn li dagirkeran çikandin. Dewleta Tirk a faşîst ji bo karibe xwe nêzî çeperên Girê Sor bike bi rojan amadekarî kir, her roj bombardûman kir, lê belê leşkerekî tenê yê bi Tirk jî newêrîbû xwe nêzî çeperên gerîla bike.
Zanîbûn ku gerîla li dijî wan xwedî wêrekî û biryardariyê ne û çi dibe bila bibe wê xaka xwe neterikîne. Sekna Girê Sor sekna berxwedana 14’ê Tîrmehê bû. Di ser vê berxwedana dîrokî re 3 sal derbas bûn. Berxwedan, îrade û bangên wan hîn jî li pêş çavên me ne. Berxwedana Girê Sor ji gelek aliyan ve ruhê PKK’ê temsîl dikir. Li ku derê ruhê PKK’ê hebe li wir serketin heye. Li ku derê fedaiyekî Rêber Apo hebe li wir astengî nîne. 7 fedaiyên Girê Sor ruhê berxwedanê yê Kemal Pîran careke din nîşan dan. Li dijî dagirkeriya dewleta Tirk her tim li çeperan şer dikirin û têdikoşiyan. Tiştekî din jî heye ku vegotina wê bi gotinan têrê nake. Têkiliyên hevrêtiyê. Hevrêtiya rast a ji bo serketinê, hevrêtiya PKK’ê bû. Hevrêyên heman dozê bûn, armanca wan yek bû. Dilê 7 lehengan jî di heman kêliyê de ji bo heman tiştî lê dida.
BI BERXWEDANA XWE 80 ROJAN DÎROK NIVÎSANDIN
Çawa ku berxwedêrên li Siyanê bi pêşengiya Şoreş Beytûşebab serdemeke nû dane destpêkirin, çawa ku berxwedêrên bi pêşengiya Serhed Giravî û Rûken Gever li Mamreşo nîşan dan ku têkoşîn wê çawa bi rê ve biçe, berxwedêrên Girê Sor ên bi pêşengiya fermandar Botan û Zinarî jî bûn nûnerê wan mirovan ku gelekî ji jiyanê hez dikirin ku di oxira wê de dikarîbûn canê xwe feda bikira. Girê Sor bi xwîna xwe bi wate kirin û bûn hevrê. Girê Sor bi wê heybeta xwe ji wan re bû biryargeh. Li dijî dewleta Tirk a dagirker mil bi mil şer kirin û gihîştin armanca xwe. Jiyan bi şehadetê naqede, ji nû ve destpê dike. Her şehadet dike ku têkoşîn û şer mezin bibe. Lehengên Girê Sor di nava 80 rojan de Girê Sor kirin keleha berxwedanê û bê navber şer kirin. 80 rojan di nava şert û mercên herî giran de li tunelên Girê Sor teslîmiyet red kirin, canê xwe feda kirin û bersiv dan her êrîşeke faşîst. 80 rojan destana fedaîtiyê nivîsandin û weke şervanên Rêber Apo derbasî nava rûpelên dîrokê bûn.
Ala berxwedanê ji Serhed, Şoreş û Rûkenan wergirtin û heta nefesa dawî li ba dan. Sê sal in hevrêyên wan ala wan li ba didin Ji Avaşînê heta Zapê, ji Metînayê heta Rojavayê Zapê bi ruhê berxwedana Girê Sor têdikoşin. Li hemberî dewleta Tirk a dagirker ku sala 2021’ê bi konsepteke nû dest bi êrîşê kir, berxwedana gerîla gihîştiye asta bilind. Gerîlayên Azadiyê di nava van salan de bi berxwedanên li Mamreşo, Girê Sor, Werxelê û Siyanê di mijara taktîkê de xurt bûn. Çeperên xwe ji bo tinekirina dagirker û xayinan heta dawiyê parastin. Her yek ji wan bû mîna Botan û Zinarîn. Sekna xwe kirin pîvana jiyanê û berxwedana xwe kirin mînak. Bi ruhekî fedaî bi ser dagirkeran ve çûn û tol hildan. Sekna ku li Metîna û Girê Spî tê nîşandan berhema lehengên Girê Sor e. Wan mohra xwe li dema xwe xistin û her yek ji wan bûn nîşaneya berxwedanê. Niha hevrêyên wan vê ala serketinê bi serbilindî li Zap û Metînayê li ba didin.
