Ji fermandarên YPJ’ê Sarya Efrîn ji ANF’ê re axivî û anî ziman ku berxwedana li dijî dewleta Tirk her roj hîn mezin dibe û got, “Li hemberî her êrîşeke li ser Kobanê amadekariyên me tam e. Kobanê keleha berxwedanê ye, keleha berxwedanê wê ti carî nekeve.”
Sarya Efrîn anî ziman ku gelên Bakur û Rojhilatê Sûriyeyê di rojên zor û zehmet de ne û got, “Ji sala 2012’an û vir ve şoreşa me dewam dike. Ji şoreşê û vir ve weke gel em bi hev re jiyan, me bi hev re têkoşîn meşand û li ber zor û zehmetiyan rabûn. Dewleta Tirk ku dijminê gelan e rojeke bi tenê jî nekarî xwe li biratiya gelan û aramiya herêmê rabigire. Efrîn, Serêkaniyê û Girê Spî encama vê xweranegirtinê ye. Niha jî Şehba û Minbic. Ddemeke li ser Minbicê êrîşên giran hatin kirin. Sala 2016’an dema ku DAÎŞ’ê êrîşî Minbicê kir, em ji bîr nakin bê gelê Minbicê em çawa pêşwazî kir. Bi taybetî jinan ber bi şervanan va beziyan û hembêz kirin. Ji gelên li vê derê bi sedan kes tevlî nava YPJ-YPG-QSD’ê bûn û heta niha bi me re meşiyan.
LI MINBICÊ BERXWEDANEKE MEZIN HATE KIRIN
Rewşa li Minbicê mirov nikare bike malê tevahiya gelê Minbicê. Li Minbicê gelek mirovên me yên hêja û alîgirên azadiyê hene. Lê belê yên ku bi dewleta Tirk xapiyan, nizanin bê wê çi bê serê wan. Li Minbicê berxwedaneke mezin hate nîşandan. Heta niha hevrêyên me li tunelan, li nava gel hene. Mînaka herî mezin a vê yekê jî Bendava Tişrînê û Qereqozax e. Yên ku rojekê Idlib, Heleb û Şam bi dest xistin, bi rojan e nikarin Qereqozax û Bendava Tişrînê bi dest bixin ku qadeke biçûk e. Ne artêşa Sûriyeyê, ne Rûsya, ne jî Îran nekarî li hemberî vê hêzê bisekine, lê belê em ku haya me ji rastiya dijmin heye, bi hêza xwe em li Tişrîn û Qereqozaxê li ber xwe didin.”
‘DIVÊ GELÊ EREB ÊŞA JI BER DEWLETA TIRK KIŞANDIYE JI BÎR NEKE’
Sarya Efrîn bang li gelê Minbicê kir û got, “Minbic bajarekî mînak ê Bakur û Rojhilatê Sûriyeyê ye ku jiyana hevpar a gelan lê heye. Bi taybetî gelê Ereb divê serwerî dîroka dewleta Tirk be û haya xwe ji rastiay wê hebe. Gelê me yê Ereb bi qasî gelê Kurd ji destê dewleta Tirk êş kişandiye. lewma divê em rabirdûya xwe, dîroka xwe ji bîr nekin. Li nava Tirkiyeyê nêzîkatiya li hemberî jinên Ereb, tundiya li ciwanên Ereb tê kirin û kedxwariya li hemberî gelê Ereb li pêş çavan e. Dewleta Tirk ji bo rojeke bi tenê jî ji bilî xwe li neteweyeke cuda nefikirî, li neteweya Ereb qet nefikirî. Eger em vê rewşê ji bo dema niha binirxînin; dema ku çete ketin nava Minbicê komkujî, destavêtin û talana ku kirin li pêş çavan e, ku ev yek hîn destpêk e. Divê em li hemberî polîtîkaya qirkirinê ya dewleta Tirk û çeteyên wê hişyar bin. Hêzên navneteweyî jî li ser xwîna gelên Sûriyeyê xwe mezin dikin û çavên xwe ji dewleta Tirk digirin. Di pozîsyoneke welê de ne ku li şer temaşe dikin. Em amade ne bi canê xwe vî gelî biparêzin.”
‘YÊN KU DIBÊJIN EW DIJBERÊ REJÎMÊ NE, XIZMETÊ JI DEWLETA TIRK RE DIKIN’
Sarya Efrîn anî ziman ku hêzên dibêjin ew dijberê rejîmê ne, ew muxalefet in, îro veguherîne çeteyên dewleta Tirk û got, “Muxalefeta Sûriyeyê divê li ruhê şoreşgerî yê sala 2011’an vegere. Yên ku rojên destpêkê qala demokrasî, edalet, wekhevî û maf dikirin, îro xizmetê ji dewleta Tirk re dikin. Piştî ku HTŞ’ê rejîma Sûriyeyê xist, rûdana atmosfera şoreşê ji bo gelên Sûriyeyê metirsiyeke mezin e. Derdroên ku xwe muxalîf nîşan didin, di çarçoveya armancên dewleta Tirk de li dijî me şer dikin. Roj wê bê, wê bibînin bê şaşitiyeke çawa kirine, lê belê ji bo wan wê dereng be.”
‘YPJ LI HER DERÊ PÊŞENG E’
Sarya Efrîn destnîşan kir ku şervanên YPJ’ê pêşengiyê ji berxwedanê re dikin û got, “Di her pêngavê de, li Tişrîn û Qereqozaxê şervanên YPJ’ê pêşengiyê dikin. Êrîşên giran li ser van deveran hatin kirin, berdêlên giran hatin dayin lê belê ji bo kêliyekê jî xwe venekişandin. Bi rojan e bi îrade û wêrekiyeke mezin şervanên YPJ’ê li refên herî pêş li ber xwe didin. Hevrêyên me yên YPJ’ê ku bi hestên welatparêziyê tevlî nava refên YPJ’ê bûn têdikoşin. Baş zanin ku dem dema şerê man û nemanê ye. Hevrêyên me yên ciwan ji bo parastina gel û xaka xwe fedakariyên mezin dikin. Li gel şert û mercên giran jî îradeyeke mezin nîşan didin. Li çeperan ji bo serketinê şer dikin. Hevrêyên me yên ciwan şehîd bûn. Heta nefesa xwe ya dawî li ber xwe dan û teslîmiyet qebûl nekirin. Li dora felsefeya ‘Em ê bi berxwedanê bi ser bikevin’ bûn yek û şehîd bûn.
LI XETÊN SÎNOR SEWQIYATEKE ZÊDE
Sarya Efrîn bersiva gefên dewleta Tirk ên li ser Kobanê jî da û axaftina xwe wiha domand:
“Eger dewleta Tirk pir dilsozê dîroka xwe ba, dema ku çeteyên DAÎŞ’ê êrîşî Kobanê kirin wê tirba Suleyman Şah parastiba. Hêza YPJ-YPG’ê ew qad rizgar kirin. Niha jî vê tirbê hincet nîşan dide û gefên êrîşan dixwe. Ew ne di ferqê de ye ku ev gef wê bibin dawiya wî. Weke şervanên vî gelî, me soz daye ku em ê yan gelê xwe biparêzin yan jî li ser vê rêyê şehîd bibin. Me ev soza xwe ji bîr nekiriye û her kes wê bibîne ku dewleta Tirk wê şikestineke çawa bijî. Me her parçeyek bi xwîna hevrêyên xwe qezenc kiriye û em hêsanî jî nadin. Di serî de Til Temir, Tirweziyê, Eyn Îsa heta hemû xetên sînor sewqiyatên mezin tên kirin. Bi hêza xwe ya cewherî û hêza manewî ya ku em ji gelê xwe digirin, em li her gund, bajar, mal, tax, kolan û cadeyê rêxistinkirî ne û em ji bo parastina gelê xwe amade ne. Me berê jî gotibû, em ê bi Şerê Gel ê Şoreşgerî serketinê teqez bikin. Eger êrîşî Kobanê jî bikin, wê li hemberî Şerê Gel ê Şoreşgerî têk biçin. Gel û şervanên gel wê li her çeperê bi hev re mil bi mil şer bikin, Kobanê û xaka xwe biparêzin. Ji bo her êrîşeke li dijî Kobanê, amadekariyên me tam in. Kobanê kelha berxwedanê ye, kelha berxwedanê wê ti carî nekeve.”
‘BI ÊRÎŞAN RE DAÎŞ XWE RÊXISTIN DIKE’
Sarya Efrîn destnîşan kir ku hewldanên DAÎŞ’ê hene ku car din li xaka Sûriyeyê zindî bibe, tevî ku hêzên navneteweyî piştgiriya dewleta Tirk a ji bo DAÎŞ’ê dizanin bêdeng dimînin û ev tişt ragihand:
“DAÎŞ ji êrîşên dewleta Tirk sûd werdigire. Yên ku DAÎŞ a hêza tarî ya ku bûye bela serê hemû cîhanê û xeteriyê çêdike, tune kirîn em bûn. Lê dewleta Tirk ê ku afirînerê DAÎŞ’ê ye, êrîşî me dike û tola DAÎŞ’ê digire. Şaneyên DAÎŞ’ê yên li zindanan, bi êrîşên dewleta Tirk re car din xwe rêxistin dikin. Bi vê yekê re ewlehiya herêmê tê hedefgirtin û hewl didin di nava gel de tirsê çêbikin. Ji ber êrîşên dewleta Tirk, em nikarn li dijî DAÎŞ’ê têkoşînê pêş bixin. Hingî ku êrîş dewam bikin, wê ji bo ewlehiya zindanan dem têrê neke. Bi van êrîşan re ne diyare ka wê li zindanên DAÎŞ’ê kengê çi çêbibe, hêzên eleqeder jî li hemberî vê rewşê çavê xwe digirin. Her wiha di nava HTŞ û çeteyên dewleta Tirk de jî hîna çeteyên DAÎŞ’ê hene û hewl didin şaneyên DAÎŞ’ê yên razayî rêxistin bikin. Lewma xeteriya ku tê fikirîn, hîn zêdetir e. Di têkoşîna li dijî DAÎŞ’ê de divê hêzên Koalîsyonê wezîfe û berpirsyariyên xwe bi cih bînin. Divê li dijî çeteyên ku dixwazin DAÎŞ’ê zindî bikin û şaneyên razayî bixin nava liv û tevgerê, bisekinin.”
‘BI RUHÊ ŞOREŞGERÎ BI ŞERVANAN RE BIN’
Sarya Efrîn bang li gelên Bakur û Rojhilatê Sûriyeyê kir û got, “Divê bê zanîn ku şerekî dijwar diqewime. Yên şer dikin, ewladên vî gelî ne. Gelê me divê mîna her demê, bi zarokên xwe re be. Divê piştgiriya xwe ya manewî, carekê jî kêm neke. Yê bikare bila çek rake, birîndarekê tedawî bike, yê bikare bila agahiyekê bide, yanî çi ji destê kê tê divê bi ruhê şoreşgerî tevlî vî şerî bibe. Eger îro me pêşî li zilma DAÎŞ’ê girtibe, me li dijî dewleta Tirk şerekî mezin dabe, me têkoşîna gelê Kurd û gelan ragihandibe cîhanê, ev bi saya piştgiriya gelê me ye. Roj roja parastina nirxên xwe, roja layiqbûna şehîdên xwe ye. Ciwan ji bo ku dersek mezin bidin dewleta Tirk, divê çek rakin û beşdarî nava refên YPJ-YPG-QSD’ê bibin.”
