Artêşa Îsraîlê bombebarankirina depo û tesîsên çekan ên rejîma berê ya Sûriyeyê didomîne.
Li gorî Navenda Çavdêriya Mafên Mirovan a Sûriyeyê (SOHR), balafirên şer ên Îsraîlê doh li herêma Seyda Zeyneb a Şamê depoyên çekan bombebaran kirin, her wiha depoyên Qeldûn ên li herêma Ceyrûd a Şamê jî hatin bombebarankirin.
Şeva 15ˈê Kanûnê jî baregeha Tugeya 23ˈyan a Parastina Hewayî, avahiya Tugeya 23ˈyan a nêzî gundê Herîsûn, Tabûra Esqebla, Dehir El Beluta, herêmên Xirab, Mesrehîn, 2 deverên nêzî Dirêkîşê, depoyên moşekan, baregeha parastina hewayî ya nêzî gundê Melka û baregehên li bakurê deşta Ekar hatin bombebarankirin. Her wiha qaîdeyên moşekan ên li baregeha 107ˈan a li herêma Zama ya Tertûsê jî hatin bombebarankirin. Hate diyarkirin ku bombebaranê 8 saetan dewam kir û wekî ya herî tund ji destpêka 2012ˈan ve hat wesifandin. Her wiha herêma Misyafê û tesîsên radaran ên li balafirgeha leşkerî ya Dêrazorê jî hatin bombebarankirin.
Li gorî SOHRˈê, di encama teqînên ji ber bombeberankirina depoyan çêkan çêbûne û avêtina moşekan de, herî kêm 36 sivîl birîndar bûne û zirar li malên welatiyan bûye.
