Bi sedan şêniyên Kantona Firatê, endamên sazî û dezgehên girêdayî Rêveberiya Xweser bi merasîmeke biheybet şervanê Hêzên Sûriya Demokratîk (QSD) Xelîl (Xelîl Bozî) ku di 7’ê Sibata 2025’an li Kobanê şehîd bûbû, îro li Pakrewangeha Şehîd Dîcle bi merasîmeke biheybet sparte axê. Her wiha ji bo şervanê Erka Xweparastinê Fêsel (Fêsel El Remedan) ku di 9’ê Kanûna 2024’an de li Minbicê şehîd bûbû û şervanê Hêzên Komandos Dilşêr Kobanê (Yasir Şêx Nebî) ku di 20’ê Çileyê 2025’an de li Bendava Tişrînê şehîd bûbû, merasîmeke bîranînê ya xiyabî hat lidarxistin.
Di merasîmê de, deqeyek rêz hat girtin, piştî rêzgirtinê Hevserokê Meclîsa bajarê Şêranê Xelîl Mihemed sersaxî ji malbata şehîdan re xwest.
Xelîl Mihemed diyar kir ku sedsala 21’an sedsala gelê Kurd e û ev tişt anî ziman: “Gelê Kurd bi têkoşîna xwe li hember dagirkeriyê li ber xwe da û sedsala 21’an sedsala gelê Kurd e. Gelê me bi berxwedan û têkoşîna xwe desthilatdarî hilweşandin.”
Endama Rêveberiya Kongra Star a bajarê Şêranê Litfiye Silêman jî anî ziman ku bila serê şervanên ku niha li Bendava Tişrînê şer dikin û serê malbatên şehîdan sax be. Litfiyê ev tişt jî ragihand: “Gel û şervanên wê bi berxwedana xwe li hember êrişên dagirkeriya Tirkiyê dîrokê bi tîpên zêrîn dinivisînin. Şehîdên me bi hemû hêza xwe li hember dagirkeriyê li ber xwe dan û heta dilopa xwîna xwe ya dawiyê têkoşîn kirin. Em jî soz didin şehîdên xwe em ê xwîna wan li erdê nehêlin.”
Li ser navê malbata şehîd Xelîl, Mihemed Bozî jî wiha got: “Bavê min ev riya şehadetê xwest, îro ew gihişt riya xwe. Xeyalên bavê min şehadet bû, vaye xeyalên wî pêk hatin. Dewleta Tirk bi hemû hêza xwe êrişî me dike lê tu carî bi hêza me nikare. Em xwedî şehîdin wê tu kes bi hêz û vîna me nikare.”
Piştî axaftinan wesîqeya şehadetê hate xwendin û radestî malbatê hate kirin.
Cenazeyê şehîd Xelîl bi tiliyên serkeftinê spartin axa pîroz.
