Destserkerina Şaredariya Bajarê Mezin a Wanê û cezayê li Hevşaredarê Bajarê Mezin ê Wanê Abdullah Zeydan hatiye birîn li gelek bajaran hat protestokirin.
DERSIM
Platforma Ked û Demokrasiyê ya Dersimê li qada Seyîd Riza daxuyanî da. Hevberdevka Kongreya Demokratîk a Gelan (HDK) Meral Daniş Beştaş, Hevserokê Partiya Sosyalîst a Bindestan (ESP) Mûrat Çepnî û gelek kes beşdarî daxuyaniyê bûn. Di daxuyaniyê de pankarta “Şaredariya Bajarê Mezin a Wanê vîna gelê Wanê ye! Qeyûm desteserkirin e, nayê qebûlkirin” hat hilgirtin. Hevserokê ESP’ê Mûrat Çepnî di daxuyaniyê de axivî û got: “AKP bi çavê rantê li şaredariyan dinêre. Lê dema em li şaredariyan dinêrin wir weke vîna gel dibînin. Şandina qeyûman dizî ye. Em şaredariyan weke temsiliyeta îradeya siyasî ya gelê xwe dibînin. Hûn nikarin îradeya gel teslîm bigirin.”
Hevberdevka HDK’ê Meral Daniş Beştaş jî axivî û wiha got: “Ji ber ku dizanin sûc dikin, nîvê şevê bi ser Şaredariya Bajarê Mezin a Wanê de girtin. Pêşî biryara qeyûmê tê dayîn, piştre dadgeh biryarê dide. Em ji qada Seyîd Riza ya Dersimê bang li AKP’ê dikin ku pirsgirêka qeyûmê çareser bike. Eger hûn dixwazin bêyî gel welat bi rê ve bibin, ev gel wê serî li ber we netewîne û wê li ber xwe bide.”
AMED
Li navçeya Bismilê ya Amedê gel li ber avahiya Partiya Herêmên Demokratîk (DBP) a navçeyê li hev civiyan û pankarta “Qeyûm derbeya li vîna gel e. Ne vîna qeyûman, vîna gel” ber bi navenda navçeyê ve meşiyan. Di meşê de dirûşmên “Bijî berxwedana Wanê” û “Qeyûm talan e, bijî berxwedana gelê Kurd” hatin berzkirin. Gelê derdorê jî bi nîşaneya serketinê piştgirî dan çalakiyê.
Hevserokê DEM Partiyê yê Bismilê Mûstafa Kûrt piştî meşê daxuyanî da û bal kişand ser hevdîtinên bi Rêber Apo re û got: “Li aliyekî aştî û li aliyê din şer nabe. Li aliyekî ji bo aştiyê şandeyê dişînin cem Birêz Abdullah Ocalan. Ji aliyê din ve jî şer dikin û vîna gel desteser dikin. Gelê Wanê ne bi tenê ye.”
Piştî çalakiya rûniştinê girse belav bû.
ERZIROM
Rêxsitina DEM Partiyê ya Qereçobanê jî daxuyanî da û desteserkirin şermezar kir. Di daxuyaniyê de pankarta “Şaredarî yên me ne. Em ê destûrê nedin desteserkirinê” hildan.
Hevserokê DEM Partiyê yê Erziromê Bariş Kemaloglû di daxuyaniyê de axivî û diyar kir ku di her şert û mercî de ew ê vîna gel û destketiyên gel biparêzin.
Daxuyanî bi çepik û dirûşmên “Bijî berxwedana Wanê” û “Em ê bi berxwedanê bi ser bikevin” bi dawî bû.
QERS
Rêxistina DEM Partiyê ya Qersê jî li ber avahiya partiyê daxuyanî da. Rêveberê DEM Partiyê Resûl Konbay anî ziman ku her tim li dijî zaliman û zilmê li ber xwe dane û got: “Şert û merc çi di bin bila bibin ev berxwedana bi rûmet wê her tim hebe û em ê bi hev re bi ser bikevin.”
