Nobeta Azadiyê ya li Wargeha Penaberan a Şehîd Rûstem Cûdî (Mexmûr) ji bo azadiya fîzîkî ya Rêber Apo di 20’ê Tîrmeha 2023’an de hatibû destpêkirin bi hemû biryardariya xwe didome. Çalakiya ji aliyê endamên Çapemeniya Azad ve hatibû dewirgirtin dewrî koma 126’an hate kirin.
Çalakî bi deqeyek rêzgirtinê dest pê kir. Piştre li ser navê Çapemeniya Azad Rojnamevan Jiyan Pîran axivî. Rojnamevan Jiyan Pîran Roja Rojnamegeriya Kurdî li hemû şehîdên Çapemeniya Azad û Kedkarên Çapemeniya Azad pîroz kir. Pîran bal kişand ser çalakiya nobetê û got: “Bi salane ji bo azadiya fîzîkî ya Rêber Apo li Mexmûrê çalakiya nobetê hatiye destpêkirin. Xelkê Mexmûrê bi kelecaneke mezin tevlî çalakiyê dibe. Dibe hinek hevdîtin hatibin kirin û gav bên avêtin, lê ev yek nayê wateya dawîbûna tecrîdê. Divê çalakiyên me hemû ser esasê azadiya fîzîkî ya Rêber Apo bin.”
Jiyan Pîran anî ziman ku bi berxwedan û rêxistinbûna gelê Kurd wê serketineke rasteqîn pêk were û got, divê gelê Kurd vê rastiyê bibîne û li gorî wê gavan biavêje.
Jiyan Pîran bal kişand bi ser helwesta dewletê jî wiha dawî li axaftina xwe anî: “Dewlet ti carî gavan ji dil navêje. Ji bo vê jî divê em hêviyên mezin ji dewletê nekin. Ya ku serketinê bîne wê têkoşîna Rêber Apo û ya gelê Kurd be. Ji bo vê divê em têkoşîna xwe mezintir bikin.”
