Meclîsa Ciwanan a Partiya Wekhevî û Demokrasiyê ya Gelan (DEM Partî) bi dirûşmeya “Em di jiyana sosyalîst de israr dikin, bi Rêbertiya azad re xwe birêxistin dikin” kampanyayek nû da destpêkirin. Kampanya li Navenda Giştî ya DEM Partiyê bi daxuyaniya çapemeniyê hat ragihandin.
Avesta Ateş daxuyaniya Kurdî û Îsa Ozgen jî daxuyaniya Tirkî xwend.
Ozgen diyar kir ku Banga Aştî û Civaka Demokratîk a Rêber Apo ya 27’ê Sibatê li cîhanê, Rojhilata Navîn, Tirkiye û Kurdistanê bi coş û hêviyê hat pêşwazîkirin û got, “Piştî banga 27ê Sibatê, bi milyonan kesên ku di 8’ê Adarê de bi pêşengiya jinên ciwan û di 21’ê Adarê de jî bi pêşengiya jin û ciwanan qad tijî kirin, bi awayekî ku cîh ji guman û nîqaşê re nehêlin, bi zelalî piştgiriya xwe ji bo bangê û muxatabiya Birêz Ocalan ragihandin. Enerjiya ciwanan a ku qad tijî kir, di Meşa Amarayê ya di navbera 1 û 4’ê Nîsanê de veguherî herikîneke siyasî, şoreşgerî û welatparêzî ya fîzîkî; ciwanên ku ji Amedê ber bi Amarayê ve diherikin, tiştên ku bi salan e nehatine bidestxistin bi dest xistin, her bajar, kolan û malên ku çûnê ji hêla dayikan ve hatin hembêzkirin û bi jin û ciwanên re heyecaneke nû afirandin û hêviya jiyana bi rûmet derxist asta herî jor. Her kesên ku şahidiya vejîna ciwanên Bakur kirin, bi hestên vê şiyarbûnê tijî bû, dîsa cewheriya şoreşgerî anîn bîra xwe û gavek din nêzîkî germahiya jiyaneke bi rûmet û azad bûn.”
Ozgen destnîşan kir ku ciwanên Tirkiye û Kurdistanê bi Meşa Amarayê re bi hev re pêş ve diçin, ji dost û dijminan re ragihandin ku ew di Şoreşa Tirkiyeya Demokratîk, Şoreşa Xweser a Kurdistanê de israr dikin û got, “Jin û ciwan wê pêşengiya jiyana hevpar a gelan bikin û ev meş heta ku gel bigihêje Konfederalîzma Rojhilata Navîn a demokratîk wê bidome.”
‘EV PÊVAJOYA AVAKIRINÊ YE’
Ozgen wiha domand: “Her ku êrîşên îmhayê yên modernîteya kapîtalîst hewl didin gelê me di warê çandî, civakî û siyasî de tine bikin, em jiyana xwe ya alternatîf bi hêza xwe ava dikin. Ev pêvajo pêvajoya avakirinê ye. Ev pêvajoyek avakirinê ye. Ev pêvajo li ser bingeha azadiya jinê, jiyana ekolojîk û civaka demokratîk radibe. Ji ber vê yekê, îradeya nû ya jiyanê ya li van axan şîn dibe ne tenê helwesteke siyasî, lê di heman demê de vejîneke çandî û ji nû ve zayîneke civakî jî temsîl dike. Li her kolanê, her taxê, her malê; ji bo xurtkirina hevgirtina gelên kevnar û xeta jiyanê ya nû ya ku di bin pêşengiya jinan de pêş ketiye, em li vir in. Em dizanin ku ev têkoşîn ne tenê ji bo beşekê ye; ew têkoşîneke hevpar a her kesên ku edalet, azadî û wekheviyê dixwazine.”
‘EM Ê ENERJIYA DERKETIYE HOLÊ VEGUHERÎNIN RÊXISTINBÛNÊ’
Di berdewamiya axaftina xwe de Ozgen ev tişt anî ziman: “Di vê çarçoveyê de em weke Meclîsa Ciwanên DEM Partiyê, bi hemû berpirsyariya xwe ya şoreşgerî û welatparêzî kampanyaya ‘Em di jiyana sosyalîst de israr dikin, bi Rêbertiya azad re xwe birêxistin dikin’ radigihînin. Di çarçoveya vê kampanyayê de, em ê li bajaran civîn û atolyeyên perwerdeyê yên ciwanan li dar bixin û enerjiya ku hatiye afirandin em ê veguherînin rêxistinbûnê.
EM BANGA DI JIYANA SOSYALIST DE AZAD BIBIN DIKIN
Kampanyaya me wê ji îro û pê ve li gelek bajarên Tirkiye û Kurdistanê bi çalakî û plansaziyan dest pê bike. Kampanyaya me ji bo gihîştina civaka demokratîk a rêxistinkirî wê bibe destpêkek girîng. Em bang li hemû ciwanên şoreşger û welatparêz ên Tirkiye û Kurdistanê dikin ku beşdarî kampanyaya me bibin û bi jiyana sosyalîst azad bibin.”
