3’yemîn rûniştina doza duyemîn a têkildarî qetilkirina Narîn Guran a 8 salî ya li Gundê Çulî yê girêdayî navçeya Rezan a Amedê li 17’emîn Dadgeha Esliyeyê ya Cezayî ya Amedê hate dîtin. Fail, parêzer û xizmên failan beşdarî rûniştinê bûn lê belê destûr nehate dayîn ku rojnameger jî beşdar bibin.
Derheqê dotmama Narîn Guranê Bîrsen Guran, mamê wê Fûat Guran, hevjîna mamê wê Maşallah Guran, hevjînê meta wê Mehmet Şevket Kaya, pismamê wê Muhammed Kaya û karkerê Salîm Guran Mehmet Selîm Atasoy de biryara dewama girtina wan hate dayîn û dotmama wê Şeyma Kaya, jinmama wê Hediye û mamên wê Halîl, Bariş, Kûrtûlûş û Omer Farûk Guran jî bêyî ku werin girtin wê werin darizandin.
Dozgerê dadgehê biryara xwe ya rûniştina di 29’ê Nîsanê de dubare kir û derheqê 15 failan de ku 6 girtî ne û 3 jî zarok in, daxwaza cezayê hepsê yê ji 6 mehan heya 5 salan kir. Dozger xwest girtina dewam bike.
Dadgehê rûniştina din a dozê ji 30’ê Gulanê re taloq kir.
