Kampanyaya “Rojên Sêşemê ji Darvekirinan re Na” ku bi pêşengiya girtiyên Îranê 77 hefte ne dewam dikin, bi tevlîbûna Girtîgeha Yezdê belavî 48 girtîgehan bû. Girtiyên ku di çarçoveya kampanyayê de daxuyanî dan, bal kişandin ser darvekirinên sîstematîk ên rejîma Îranê û banga mezinkirina berxwedanê kirin.
Girtiyan diyarkirin ku bi geşedanên dawî re 3 girtiyên siyasî rûbirûyê biryarên darvekirinê ne û wiha gotin: “Du caran cezayê darvekirinê ji aliyê Dadgeha Şoreşê ya Ahvaz ve ji bo Ferşad Etemadîfer, Mesud Camii û Elireza Merdasî hatine birîn.”
Di daxuyaniyê de hate diyarkirin ku sê girtiyên siyasî-olî yên Ereb Elî Mucdem, Muîn Hanferî û Mihemmed Riza Muhaddem birine hucreyên înfazê û agahî ji wan nayê girtin.
DARAZ NE EDALETÊ LÊ CEZAYÊ BELAV DIKE
Di daxuyaniyê de hate destnîşankirin ku serlêdana ji nû ve darizandinê ya girtiyên siyasî Mehdî Hasanî û Behruz Ehsanî cara çaremîn hate redkirin û tê astengkirin ku parêzer xwe bigihînin van dosyayan. Hate diyarkirin ku ev rewş bi eşkerehî li dijî qanûnê ye.
Di daxuyaniyê de hate bi bîr xistin ku ji serê meha Tîrmehê ve 44 kes ku yek ji wan jin e, hatine darvekirin û du ji wan jî li Miandoab û Bokanê li pêşiya gel hatine darvekirin û wiha hate gotin: “Ev darvekirin ji bo çavtirsandina gel in.”
GIRTÎGEHA YEZDÊ JÎ TEVLÎ BERXWEDANÊ BÛ
Kampanyaya “Rojên Sêşemê ji Darvekirinan re Na” bi tevlîbûna Girtîgeha Yezdê re berfireh bû. Girtiyan wiha gotin: “Em wekî beşdarên vê kampanyayê zextên dewletê yên li dijî van malbatan şermezar dikin û bang li gel dikin ku dîkên darvekirinan veguherînin qadên berxwedanê.”
‘EM Ê VÊ PERGALA DARVEKIRIN Û ZEXTÊ BI HEV RE HILWEŞÎNIN
Girtiyan diyarkirin ku kampanya ne tenê protestoyekî ye, di heman demê de tevgerekî azadiyê ye û wiha gotin: “Hêza me ji ber yekîtiya me ye. Bawer bin ku em ê vê pergala darvekirin û zextê bi hev re hilweşînin.”
