Navenda Ragihandinê ya QSD’ê bi daxuyaniyekê şehadeta fermandar Ceger Başkale (Ferhad Parlak) ragihand.
Daxuyanî bi vî rengî ye:
“Hevrê me yê şehîd Ceger ji malbateke welatparêz a xwedî dîrokeke dirêj a têkoşîna neteweyî ye. Hejmarek ji endamên malbata hevrêyê me di parastina şoreş û welat de şehîd bûne, hevrê Ceger jî ku di atmosfera tijî hestên neteweyî de mezin dibe, biryar dide ku tevlî refên hêzên me bibe.
Hevrê Ceger di wê baweriyê de bûn ku berpirsyarî û parastina welat ji hemû cûryên êrişên dijmin ji ciwanan tê xwest, li ser vê yekê jî hemî hêza xwe ji bo serxistina şoreşê û armancê wê veqetand. Lewra jî di meşa xwe ya demdirêj de di hemû qadan de ala serkeftinê hilgirt û serkeftin bi dest xist.
Hevrêyê me yê şehîd Ceger bi coş û kelecan beşdarî gelek dewreyên perwerdeyê bû, jêhatîbûn û ezmûnên bi dest xist. Zanistên şer û hunera rêveberiya şer û taktîkan wergirt pratîze kir. Hevrê Ceger bû fermandarekî meydanê yê şoreşger, hêzan bi awayekî baş bi rêve dibir û serketinên mezin pêk dianî.
Hevrêyê me yê şehîd di şerên li dijî dagirkeriya Tirk û çeteyên wê yên li Girê Spî de li pêş bû û heta kêliyên dawî li ber xwe dida. Lê ji ber parçeyên bombeyên balafirên dewleta Tirk a dagirker ku li bedena wî xist, nikarî berxwedanê bidomîne. Beriya vê jî anku cara yekemîn di sala 2012’an de ji ber bermahiyên topan ji serê xwe û di 2015’an de jî ji çavê xwe ve birîndar bibû, lê tevî birînên wî ku bandor li rihê wî yê germ ê şoreşgerî nekir, heya kêliya şehadeta xwe di nava refên hêzên me de karê xwe dewam kir.
Hevreyê me Ceger nasnameya xwe şoreşgerî diparast, îsrara wî ya domandina meşa di nava hêzên me de lawaz nedibû. Hevrê Ceger ê li gelek eniyên şer xebitî, erk û mîsyona perwerdekirina hevalên xwe li ser hunera şer jî girt ser xwe, hewl dida her şervanek xwe bi zanistên şerê nûjen, hurguleyên êriş û parastinê pêş bixe.
Li gel jêhatîbûna xwe ya leşkerî, hevrê me Ceger xwedî himşemdiyek siyasî ya ronakbîr bû; dikarîbû rewşên siyasî di hemû pîvan û astên wan de analîz bike û ji wan encamên girîng derxe ku di fêmkirina rewşê de bibe alîkar. Hevrê Ceger xwedî zimanekî retorîkî yê sade bû. Hevrê Ceger salên dirêj di xwendin û lêgerîna çareseriyên şoreşgerî ji pirsgirêkên gelê me re derbas bû. Ne tenê fermandarekî leşkerî bû, lê di heman demê de têkoşerekî siyasî di nava civakê de bû.
Hevrê me bi nêzîkatiya xwe ya aram û pîvandî ya li hember her bûyerê dihat naskirin, ji bo fêmkirina aliyên siyasî û leşkerî yên pirsgirêkê xwe dispart nêzîkatiyek analîtîk, bi lez û bez biryar dida, lê mijar ji her alî ve lêkolîn dikir, bi kesên li dora xwe re şêwir dikir, piştre bi lez û bez pratîze dikir, her timî jî karê kolektîf di ser yê ferdî de tecrîd dikir.
Hevrê Ceger tevî rihê xwe yê hevlatiyê yê bilind, bi awayekî wekhev û durst nêzî hemû hevalên xwe dibû û rihê hezkirin û tevkariyê di wan de diçand. Her wiha beşdarî çareserkirina pirsgirêkên wan ên kar û yên şexsî jî dibû. Di dayîna alîkariyan ji hevalên re jî rojekî dudilî nedibû. Ji hevalên xwe bira, rêveber û heval bû. Şehadeta wî êşeke mezin xist dilê hemû kesên ku pê re kar kirin û wî nas kirin.
Em sersaxiyê ji xwe, ji malbata şehîd û tevahiya malbatên şehîdên xwe re dixwazin. Îro israra me ya pêkanîna xeyalê şehîdên me ya avakirina welatekî ewle, bi silamet ê bêyî teror û dagirkirî zêdetir dibe.”
NASNAMEYA ŞEHÎD
Nasnav: Ceger Başkale
Nav û paşnav: Ferhad Parlak
Navê dayikê: Xecê
Navê bav: Tahir
Cih û dîroka şehadetê: Kobanê, Çelebiyê-gundê Ebû Sira, 15 Tîrmeh 2025.
