Di daxuyaniya Koordînasyona KJK’ê de ev tişt hatin diyarkirin:
“Li dijî sîstema modernîteya kapîtalîst a ku gelên me ber bi bêhêvîtiyê ve dibe, Şoreşa Jinê ya Rojava hêviya gelan e. Di sala 14’an a şoreşê de, di şexsê Arîn Mîrkan, Revan, Avesta Xabur, Barîn, Aylan, Polat, Aqide Ana, Ebu Leyla, Ayşe Deniz, Helin İngiliz, Sorxwin Rojhilat, Jiyan û Sosin de em bi deh hezaran şehîdên Şoreşa Rojava bi rêzdarî û minetdarî bi bîr tînin û bi mezinkirina têkoşîna şoreşê soz didin ku girêdayî bîranînên wan bimînin. Dîsa ciwanên me yên şoreşger û demokrat, 33 Rêwiyên Hêviyê yên ku 20’ê Tîrmeha 2015’an ji bo bibin pira ji Bakurê Kurdistanê û Tirkiyeyê heya Kobanê bi rê ketin û li Pirsûsê di encama êrîşa bombeyî ya DAÎŞ’ê de şehîd bûn, bi rêzdarî û minetdarî bi bîr tînin û soza xwe dubare dikin ku xeyala wan a herî mezin avakirina civaka demokratîk, pêk bînin.
ŞOREŞA ROJAVA WEKE ŞOREŞA JINÊ NASNAME QEZENC KIR
Sîstema kapîtalîst ji bo ku bi destê netew dewletan sedsala 21’an bike sedsala şer û komkujiyan, her cure hewldana qirêj kir. Şoreşa Rojava hêviya hemû mirovahiyê mezin kir, îspat kir ku jiyana demokratîk û azad pêkan e. Jinên cewherê civakê, di projeya Rêber Apo de cewherê xwe yê winda dîtin û ji bo car din bi kevneşopiya azad a qedîm a xaka Mezopotamyayê re bên ba hev, bi dil û can xebitîn. Jinên ku sembola dilsoziya bi xak û nirxên xwe re ne, pêşengî ji Şoreşa Rojava re kirin û di berdêla canê xwe de bûn hêza ku şoreşê pêş dixin. Berxwedana hêzên YPJ’ê, bû berxwedana herî xurt a ku îspat dike sedsala 21’an sedsala jinê ye û Şoreşa Rojava weke Şoreşa Jinê nasname qezenc kir.”
KJK’ê diyar kir ku Rêber Apo qasî 20 salan li Rojava ji perwerde heta rêxistinbûnê, ji dîplomasî heta parastinê di gelek mijaran de ked da û weke encama vê kedê, li Rojava Şoreşa Jinê pêş xist û salvegera şoreşê li Rêber Apo, dayikên ku ji canê xwe parçe dane şoreşê, gaziyan, hemû jinan û gelan pîroz kir.
KJK’ê destnîşan kir ku parasgina Şoreşa Rojava, erk e û got, “Divê gelên Bakur û Rojhilatê Sûriyeyê rê nedin faşîzmê û asta şerê gel xurt bikin û mezin bikin, ev yek berpirsyariyeke dîrokî ye.”
ÇARESERÎ MODELA NETEWA DEMOKRATÎK A RÊBER APO YE
KJK’ê ev tişt jî got: “Paşverûtiya HTŞ’ê ya ku bi hezaran Elewî qetil kir, ji 13’ê Tîrmehê û vir ve berê xwe daye bajarê Siwêdayê û Durziyan, di nava çend rojan de nêzî 600 mirovên me yên Durzî qetil kirin, jin û zarok revandin. Li gundê Eldor dayika bi navê Fewziye Fexredîn El Şeranî dema gundê xwe diparast, 6 çete kuştin, şer kir û şehîd bû. Sekna bi rûmet a vê dayikê ji bo hemû gelên qedîm ên Sûriyeyê û bi taybetî jî ji bo jinan banga xweparastin û rêxistinbûnê ye. Çareseriya van komkujî û zihniyete yekperest, di modela Netewa Demokratîk a Rêber Apo de ye.
Em bbang li hemû Kurdên welatparêz, rêxistinên şoreşger û demokrat, kes û jinên azadîxwaz dikin ku ruhê berxwedanê yê şehîdên me yên Rojiya Mirinê ya Mezin a 14’ê Tîrmehê, bi coşa şoreşa 19’ê Tîrmehê re bikin yek û li dijî faşîzm, mêtingerî, zihniyeta yekperest têkoşîna azadî û wekheviyê mezin bikin. Û em dibêjin ku berxwedan, rêxistinbûn û têkoşîna jinan, wê bibe teminata herî mezin a Sûriyeya demokratîk.”
