Rêveberiya Xweser a Şengalê bi wesîleya salvegera 13’emîn a Şoreşa Rojava daxuyaniyek nivîskî weşand.
Daxuyanî bi vî rengî ye:
“Bi navê Rêveberiya Xweser a Şengalê, em salvegera 13’emîn a Şoreşa Rojava li tevahiya gelên Bakur û Rojhilatê Sûriyeyê, bi taybetî li gelê Kurd pîroz dikin. Ev şoreş, ku di 19’ê Tîrmeha 2012’an de dest pê kir, ne tenê ji bo herêmê, lê ji bo tevahiya Rojhilata Navîn bû bingehek ji bo jiyaneke nû ya azad û bi rûmet. Em di vê roja dîrokî de, bîranîna hemû şehîdên şoreşê bi rêzdarî bibîr tînin û bejna xwe li ber fedekariya wan ditewînin.
Em careke din spasiya gel û rêveberiya Rojava dikin ku di dema êrîşên hovane yên DAIŞ’ê yên li ser Şengalê de di Tebaxa 2014’an de, bêyî dudilî deriyên xwe li penaberên Êzidî vekirin. Di wan rojên tarî de, dema ku bi hezaran Êzidî ji qirkirinê direviyan, gelê Rojava bi fedakarî û mirovheziya xwe rabû ser piyan. Bi hezaran Êzidî li kampên Rojava hatin bicihkirin û her tiştê pêwîst ji wan re hate peydakirin. Ev helwest, nîşaneya xwişk-biratî û yekîtiya gelên herêmê ye û dê di dîroka me de her tim bi tîpên zêrîn bê nivîsandin. Her wiha, hêzên YPG/YPJ’ê bi lez û bez korîdoreke mirovî vekirin da ku Êzidî bi ewlehî bigihîjin cihên parastî. Ev piştgiriya bêpîvan, dilsoziya gelê Rojava ya ji bo gelê Êzidî di demên herî dijwar de nîşan dide û tekez dike ku nirxên mirovî li ser her tiştî ne.
EZMÛNA ŞOREŞA ROJAVA JI BO ŞENGALÊ
Şoreşa Rojava ji bo Şengalê bûye çavkaniyeke girîng a îlham û tecrûbeyê. Piştî ferman û êrîşa DAIŞ’ê, gelê me yê Êzidî biryar da ku xwe bi rêve bibe û sîstema xwe ya xweser ava bike. Di vê pêvajoyê de, modela Rêveberiya Xweser a Rojava ji bo me bû mînakek sereke. Me ji tecrûbeyên wan fêr bû ku çawa em dikarin civaka xwe li ser bingeha xwe-parastin, birêxistinkirin û biryargirtina hevpar ava bikin. Rêveberiya Xweser a Şengalê, ku bi hewldan û xwîna şehîdan hate avakirin, îro li ser rêya pêşkeftinê dimeşe û ji bo ewlehiya gelê Êzidî û pêşerojeke baştir dixebite.
Di nava van 13 salan de, Şoreşa Rojava destkeftiyên mezin bi dest xistine, nemaze di warê rêveberiya xweser, wekheviya zayendî, perwerdehiya bi zimanê zikmakî û parastina civakên cihêreng de. Ev destkeftî ji bo Şengalê jî rê nîşan dane ku çawa dikare bi hêza xwe ya rêxistinî û civakî, xweseriya xwe biparêze û siberojeke baştir ava bike. Em bawer dikin ku bi hevgirtina gelên herêmê û bi xurtkirina rêveberiyên xweser, em ê karibin li hemberî hemû êrîş û gefan bisekinin û aştî û aramiyê li herêmên xwe bicîh bikin.
Careke din, em salvegera Şoreşa Rojava pîroz dikin û soz didin ku em ê li ser şopa berxwedan û têkoşînê bimeşin. Em bang li hemû hêzên demokratîk û mirovheiyê dikin ku piştgiriyê bidin destkeftiyên Şoreşa Rojava û Rêveberiya Xweser a Şengalê ji bo avakirina Rojhilateke Navîn a azad û demokratîk.”
