Partiya Jiyana Azad a Kurdistanê bi boneya 13’emîn salvegera Şoreşa Rojava daxuyaniyek belav kir. PJAK’ê ragihand ku Şoreşa Rojava ji bo destpêkirina guhertina demokratîk a li Rojhilata Navîn, modeleke.
Daxuyaniya PJAK’ê wiha ye:
“Em salvegera 13’emîn a şoreşa Rojava û Bakurê Sûriyeyê li hemû gelên herêmê pîroz dikin. Ev şoreş ji bo tevahiya Rojhilata Navîn modelek demokrasiyê ye û bandora wê li ser tevahiya herêmê heye. Modela demokratîk a Rojava, li Rojhilata Navîn ku di krîzeke piralî ya mezin de asê maye, wekî tekane çareseriya alternatîf ji bo pirsgirêkan û wekî modelek derketiye holê ku hemû netewe û cihêrengiya çandî dikarin di pergala xwe ya demokratîk de bi hev re bijîn. Ev modela demokratîk li ser afirandina azadiya jinan û bihêzkirina civakê hatiye avakirin.
Niha Sûriye û Rojavayê Kurdistanê di qonaxa xwe ya herî hesas de derbaz dibin, her destwerdana siyasî ya derveyî ya otorîter û wêranker dê zirarê bide civakê. Komkujiyên li Sûriyeyê nîşan didin ku çareseriya bingehîn ne ewe ku dîktatorî dîsa werin guhertin û krîz kûrtir bibe. Çareseriya rasteqîn ewe ku cewherê pergalê ji dîktatoriyek navendî û înkarker were guhertin û li şûna wê sîstemeke ku tê de hemû cihêrengiyên etnîkî û çandî li Sûriye û Rojavayê Kurdistanê xwerêveberiyeke demokratîk bi dest bixin were danîn.
Şoreşa Rojavayê Kurdistanê di demekê ku Sûriye di nav tofaneke tirsnak a terorîstên DAIŞ’ê û hêzên din ên kirêgirtî de asê mabû de, pêk hat. Ji ber vê yekê, ew rastiya ku Rojava û Bakur û Rojhilatê Sûriyeyê karibûn pergalek demokratîk li ser bingeha hevjiyana demokratîk a cihêrengiyê û prensîba bêalîbûnê ava bikin, pir bi nirxe. Ev sîstem dikare ji bo demokratîkbûna Rojhilata Navîn, bi taybetî jî li Îranê, bibe modelek. Bê guman destkeftiyên demokratîk ên vê Şoreşê dikarin sûdê bidin hemû gelên Rojhilata Navîn. Nîşanên bandora vê pêvajoya demokratîkbûnê hîn jî hene û çalakin. Şoreşa Rojava ji bo destpêkirina guhertina demokratîk a li Rojhilata Navîn, modeleke.
Wek Partiya Jiyana Azad a Kurdistanê (PJAK), em 13’emîn salvegera vê sîstema tijî destkeftiyên demokratîk li hemû gelan, bi taybetî li gelên Sûriyeyê û Rojavayê Kurdistanê pîroz dikin. Pêşketin û geşbûna sîstemeke demokratîk li ser beşdariya hemû mirovane. Pelên zêrîn ên dîrokê têne parastin.
Sîstemeke demokratîk û nenavendî divê layîqî tevahiya civaka Sûriyeyê be. Her wiha Rojavayê Kurdistanê divê di nava aramî, ewlehî û aştiyê de berdewam bike û ji bo hemû gelê Sûriyeyê pêşerojeke nû ava bike.”
