Li hejmarek bajêran jin derketin kolanan û bal kişandin ser êrîşên HTŞ’ê û diyar kirin ku zêdetirî 12 hezar jin û keçên Elewî hatine revandin û daxwaz kirin ku bila rola dewleta Tirk ya di van sûcan de were lêkolînkirin. Înîsiyatîfa Jinan a “pêdiviya min bi aşitiyê heye”, li dijî êrîşên li ser jinên Elewî û Dûrzî yên li Sûriyê, li Wan, Riha û Hatayê bi daxuyaniya hevdem nerazîbûn nîşan da.
WAN
Înîsiyatîfa Jinan a Pêwîstiya Min bi Aştiyê Heye, li Wanê derbarê êrişên HTŞ’ê yên li ser jinên elewî yên li Sûriyeyê daxuyaniyek da û got: “Em ê bi hemû jinên ji Xezzeyê, Rojava, Îran, Sûriyeyê, Suryaniyan, Elewî, Durzî, Ermeniyan, Asûriyan û Kurdan re li dijî şerê herêmî, destdirêjî û qirkirinê, ji bo jiyana xwe şer bikin û piştgiriyê bidin hev.”
Înîsiyatîfa Jinan a Pêwîstiya Min bi Aştiyê Heye, li Wanê derbarê êrişên HTŞ’ê yên li ser jinên elewî yên li Sûriyeyê daxuyaniyek da. Jinan li Kolana Hunerê ya Rêya Armûşê a Wanê kom bûn û pankarta “HTŞ li Sûriyeyê jinên Elewî qir dike” vekirin. Hevşaredara Bajarê Mezin a ku li şûna wê qeyûm hat tayînkirin Neslîhan Şedal, hevseroka Partiya Herêmên Demokratîk (DBP) ya bajêr Gonul Uzunay, aktîvîstên Tevgera Jinên Azad (TJA), Komeleya Hiqûqnasên ji bo Azadiyê (OHD), Komeleya Mafên Mirovan (ÎHD), nûnerên saziyên sivîl û gelek kes beşdarî daxuyaniyê bûn. Metna daxuyaniyê ji hêla endama Lijneya Rêveberiya Komeleya Jinan a Star a Wanê Meryema Aslan xwend.
Di daxuyaniyê de wiha hat gotin: “Em ê li dijî kirîn û firotina jinan, koletiya jinê û sûcên ku li dijî Elewiyan pêk tê têbikoşin. Ji ber ku ji bo me aştî tê wateya avakirina jiyaneke wekhev û azad li vê herêmê. Em ê bi hemû jinan re Xeza, Rojava, Îranî, Suryanî, Elewî, Durzî, Ermenî, Asûrî û Kurd ku li hember şerê herêmî, desdirêjî û qirkirina ku ji hêla emperyalîst û siyonîstan ve ji bo berjewendiyên xwe yên siyasî, leşkerî û bazirganî tê kirin, ji bo jiyana xwe li ber xwe didin, piştgiriyê bidomînin. Em bang li hemû jinan dikin ku bi hev re li dijî qirkirina li dijî Elewiyan û di vê çarçoveyê de li dijî sûcên li dijî jinan têkoşînê mezin bikin.”
Daxuyanî bi berzkirina dirûşmeyan bi dawî bû.
RIHA
Înîsiyatîfa Jinan a Pêwîstiya Min bi Aştiyê Heye, li ber Parka Nova ya navçeya Xelîliye ya Rihayê bi şîara “Em li gel jinên Elewî yên li Sûriyeyê ne, em li dijî komkujî û baviksalariyê serî radikin” li ser komkujiya jinên Elewî yên li Sûriyeyê civîneke çapemeniyê li dar xist.
Nûnerên rêxistinên Rihayê, aktîvîstên Tevgera Jinên Azad (TJA), Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî), Komeleya Hiqûqnasên ji bo Azadiyê (OHD), Komeleya Mafên Mirovan (ÎHD), Meclîsa Dayikên Aştiyê ya Rihayê, Platforma Jinan a Rihayê, Komeleya Jinan a Mala Jinê û û gelek kes beşdarî daxuyaniyê bûn. Metna hevpar daxuyaniyê ji hêla berdevka demê ya Platforma Jinan a Rihayê û di heman demê de koodînatora Jinan a OHD’ê ya Rihayê Mîzgîn Kurtoglu ve hat xwendin.
HATAY
Li navçeya Defneyê ya Hatayê jî jinan li ber Lîseya Anadolû ya Necmî Asfuroğlu kom bûn û daxuyaniya çapemeniyê dan. Bi dirûşma “Em li Sûriyê li gel jinên Elewî ne, li dijî qirkirinê û patrîarkiyê serî hildidin” derket pêş. Hûlya Kavuk ku daxuyanî xwend, diyar kir ku jin di şer de bi awayekî herî giran bedelê didin.
Di daxuyaniyê de ev yek hate gotin: “Em ê li dijî veguherîna vî welatî bo bazarekê ku jin tê de tên firotin û kirîn derkevin. Em ê bi hemû jinên ku li dijî şerên berjewendiyên emperyalîst û siyonîst berxwedanê didin, hevgirtina xwe bidomînin. Em ê li hemberî qirkirina jinên Elewî bêdeng nemînin.”
