Agirbesta ku li Siwêdayî hatî îlankirin, ji aliyê komên çekdar ên girêdayî rêveberiya Şamê ve hate binpêkirin. Ji vê siharê ve bi obusan gundên Rim El-Hezem û Til Şîhan hatin hedefgirtin. Çavkaniyên herêmî ragihandin ku piranî êrîş ji bajarê Derayê tên, bi taybetî komên ji gundên Wealxa û Erîqayê hatin, dest bi talan û wêranê kirine.
Çavkaniyên herêmî tiştên qewimîne şibandin pevçûnên li Lazqiye û Tartusê û ev şîrove kirin: “Komkujiyeke mîna ya li peravê, li Siwêdayê dubare dibe. Wiha hate gotin: “Her tiştê li herêmê weke ganimet tê dîtin û dibin.”
LI BAJÊR XIZMET SEKINÎ, NEXWEŞXANE NAXEBITIN
Li navenda Siwêdayê elektrîk, av û xizmetên înternetê bi rojane qut in. Binesaziya tenduristiyê hilweşiyaye; nexweşxaneya bajêr ji ber êrîşên çeteyan naxebitin. Welatiyên birîndar û nexweş ji ber ku nikarin xwe bigihînin rêxistinên tenduristiyê, jiyana xwe ji dest didin.
Çavkaniyeke ji bajêr, ev agahî da: “Li herêma Salxad a Siwêdayê gelek kesên nû hatin bicihkirin. Ev kom ber bi gundên li rojhilat ve diçin. Em dixwazin ji navenda bajêr biçin nuqteyên dûr, ji ber ku êrîş ji aliyê Derayê tên. Em li gorî agirbestê tevdigerin, lê êrîşên aliyên dijber bênavber didomin. Rêveberiya Şamê, di bin sîwana eşîran de êrîşî gelê Durzî dike. Komên terorîst, destpêke weke şervan dikevin hundir û piştre xwe weke alîgirê aştiyê didin naskirin. Ev taktîkek e.”
TENÊ YEK FIRIN VEKIRÎ YE, BI HEZARAN KES JI BO NAN DI RÊZÊ DE NE
Li bajêr tenê yek firîn vekirî ye. Bi hezaran kes tevî êrîşan jî, li ber vê firinê di rêzê de ne. Bi rojane gel nikare xwe bigihîne pêdiviyên esas.
Hin welatiyên ku ji ber êrîşan ji Siwêdayê çûne, li herêmên ku hinekî şer lê rawestiyaye jinûve dest bi vegera bajêr kirin. Lê yên vegeriyan jî bi heman pirsgirêkan re rû bi rû ne: bê ewlekarî, nebûna xizmetê û kêmahiya pêdiviyên esas ên jiyanê.
Li bajarê Siwêda ya ku li başûrê Sûriyeyê cih digire, ji 13’ê Tîrmehê ve ji ber êrîşên çeteyên selefi yên li ser gelê Durzî krîzeke mezin a mirovî heye. Êrîş bi liv û tevgera hevpar a DAÎŞ, HTŞ, El Qaîde, SMO û rêxistinên din ên cîhadîst pêk tên. Colanî yê ku weke “Serokê Demkî yê Dewleta Sûriyeyê” tê pênasekirin û bi têkiliya xwe ya berê bi DAÎŞ’ê re tê naskirin, fermanê dide van komên navborî.
