Bi wesîleya 1’ê Îlonê Roja Aştiyê ya Cîhanê li Amedê bi pêşengiya Platforma Demokrasî û Kedê ya Amedê û Platforma Saziyên Demokratîk meşeke bi coş û girseyî hate lidarxistin. Bi deh hezaran kes tevlî meşê bûn û daxwaza aştiyê kirin.
Dayika Aştiyê Muşereh Ulker diyar kir ku li gel mehên di ser ‘Banga Aştiyê’ ya Rêber Apo re derbas bûn hîn jî dewletê gaveke şênber neavêtiye û got, “Beriya her tiştî ez Rêber Apo û şervanên azadiyê silav dikim. Di 27’ê Sibatê de dema ku vê pêvajoyê destpê kir, ji hingî ve em dibînin ku dewleta Tirk gavek neavêtiye. Em îro ji bo aştiyê li vê derê ne, em ê ji bo aştiyê bimeşin. Em ê daxwaza xwe ya ji bo aştiyê ji tevahiya cîhanê re ragihînin. Bi sedan salan daxwazên gelê Kurd ji nedîtî ve hatin, gelê Kurd weke gefekê dîtin.
Îro hem Tirk hem jî Kurd divê xwedî li vê pêvajoyê derkevin. Em ji komîsyona hatiye avakirin hêvî dikin ku gavên girîng biavêje. Dayikên Aştiyê çûn wê meclîsê, lê belê nehiştin ku bi zimanê xwe biaxivin. Ev yek bû sedem ku baweriya me bişikê. Em ji dewletê dixwazin ku bi zelalî tevbigere.”
‘GELÊ KURD DI AŞTIYÊ DE ISRAR DIKE’
Mûstafa Yaşodûn bi bîr xist ku gelê Kurd ji bo aştiyê berdêlên giran da û got, “Gelê Kurd, Rêberê Gelê Kurd Abdullah Ocalan pêvajoyek da destpêkirin. Vê pêvajoyê bi banga 27’ê Sibatê destpê kir. Berê jî hin pêvajoyên aştiyê destpê kiribûn, lê belê encamek jê nehatibû bidestxistin. Gelê Kurd îro careke din israra xwe ya ji bo aştiyê dewam dike. Bi pêngava aştiyê ya Rêber Apo re hewldaneke mezin ji bo aştiyê heye.
Lê belê hîn jî êrîş li ser Herêmên Parastinê yên Medyayê têne kirin. Tişta ku divê bê pirsîn ev e: Gelo dewlet û desthilatdarî aştiyê dixwazin? Yekane daxwaza gelê Kurd; azadiya Rêber Apo û aştî ye.”
‘DIVÊ HER KES XWEDÎ LI AŞTIYÊ DERKEVE’
Mehmet Çetîn jî destnîşan kir ku Kurd bi rengekî cidî xwedî li Rêber Apo û aştiyê derdikeve û got, “Em vê pêvajoyê gelekî girîng dibînin. Em dixwazin nasname, ziman û çanda gelê Kurd bêne naskirin. Bendewariya me ji vê pêvajoyê gelekî mezin e. Ez dixwazim her kes tevlî vê rêyê bibe ku qasidê aştiyê Rêber Apo diyar kiriye, divê her kes xwedî li aştiyê derkeve. Divê dewlet tavilê gavê biavêje.”
