“Komîsyona Demokrasî, Xwişk-Biratî û Piştevaniya Mîllî” ku di çarçoveya Pêvajoya Aştî û Civaka Demokratîk de li Meclîsê hat avakirin û xebatên xwe didomîne, di 20’ê Tebaxê de guh da Dayikên Şemiyê û Dayikên Aştiyê. Serokê Komîsyonê Nûman Kurtulmuş bi hinceta rêziknameya navxweyî ya Meclîsê, axaftina Dayikên Aştiyê ya bi Kurdî asteng kir. Ji dayikên ku beşdarî civîna komîsyonê bûn, Dayika Aştiyê Sûltan Bozkurtê ku axaftina wan ya bi Kurdî hat astengkirin, xwest dewleta Tirk li hemberî gelê Kurd bi dilsoz be û got: “Em naxwazin êdî bi têgeha ‘teror’ê bên naskirin. Divê dewlet daxwazên me bi cih bîne. Gelê Kurd û Rêber Apo hemû berpirsyariyên xwe bi cih anîne.”
‘ZAROKÊN ME LI DIJÎ VÊ NEHEQIYÊ BERXWEDANÊ DIKIN’
Dayika Aştiyê Sûltan Bozkurt diyar kir ku wekî dayik 28 sal in ji bo aştiyê ti derî nehiştine ku lê nexistine û wiha got: “Hemû derî li ser rûyê me hatin girtin, lê çi bibe bila bibe, me baweriya xwe ya bi roja ku aştiyê tê winda nekir. Derdê me tenê ev e ku li van axan aştî pêk were. Li ku derê bêedaletî û nehiqûqî hebe, divê mirov li dijî wê derkeve. Heta niha gelê Kurd li hemberî bêedaletî û nehiqûqiyê 29 caran serî hilda. Zarokên me li dijî vê neheqiyê berxwedanê dikin. Her tiştê me qedexe ye. Navên gundên me, navên bajaran û navên me jî qedexe kirin. Navê keça min jî qedexe kirin. Min nekarî navê Kurdî li keça xwe bikim.”
‘PÊVAJOYA AŞTIYÊ JI BO HEMÛ GELAN BÛ HÊVÎ’
Sûltan Bozkurt destnîşan kir ku pêvajoya ku Rêber Apo dest pê kir ne tenê ji bo Kurdan, lê ji bo hemû gelan hêviyek e û wiha pê de çû: “Rêber Apo salên dirêj e dibêje ku pirsgirêka Kurd divê di meclîsê de bê çareserkirin. Dema komîsyon hate avakirin, me ev yek girîng û hêvîdar dît, lê di civînê de axaftina bi Kurdî ji me re qedexe kirin. Em bi şefafî û hesasiyetê nêzî vê pêvajoyê dibin. Dema ku em di nav pirsgirêkeke 100 salî de ne û ez nikarim bi zimanê xwe xwe îfade bikim, ev nîşan dide ku pirsgirêk gelekî giran û kûr in.”
‘DIVÊ DEWLET LI HEMBERÎ GELÊ KURD DILSOZ BE’
Sûltan Bozkurt bilêv kir ku divê dewlet zû gavên berbiçav bavêje û wiha bi dawî kir: “Pêşî divê hemû qedexeyên li ser zimanê Kurdî rakin û wê wekî zimanekî fermî qebûl bikin. Divê dewlet baweriyê bide me. Dewleta Tirk divê li hemberî gelê Kurd bi dilsoz be. Me her tim ji bo aştiyê têkoşîn kir. Zarokên me ji bo mafên xwe têdikoşin. Divê êdî dev ji naskirina me bi têgeha ‘teror’ê berdin. Em vê têgehê ya ku ji bo zarokên me tê bikaranîn qebûl nakin. Em naxwazin êdî ti dayik bigrî. Divê dewlet daxwazên me bi cih bîne. Gelê Kurd û Rêber Apo hemû berpirsyariyên xwe bi cih anîne.”
