Şoreşa 19’ê Tîrmehê ya di heman demê de weke Şoreşa Rojava û Şoreşa Bakur û Rojhilatê Sûriyeyê tê binavkirin, bi ked û xwîna bi hezaran şehîd û birîndaran ava bû û pêş ket. Ev şoreş îro ji bo çareseriya tevahiya Sûriyeyê û herêma Rojhilata Navîn weke çavkaniyeke tijî hêvî û îlham ji mirovan re bûye hêzeke mezin.
Faysal Ebû Leyla Minbic ê sala 2024’an weke ciwanekî Ereb tevlî nav refên QSD’ê bûye, sala 2024’an di berxwedana Bendava Tişrînê de birîndar dibe û lingekî xwe winda dike. Gaziyê şer Faysal têkildarî tevlîbûna xwe û şoreşa Bakur û Rojhilatê Sûriyeyê nêrînên xwe bi me re parvekirin.
‘EM JI MIRINÊ MEZINTIR IN’
Gaziyê şer Feysel Ebu Leyla Minbic diyar kir ku ji bo parastina rûmet û kerameta gelên Sûriyeyê tevlî nav hêzên QSD’ê bû û got, “Min fikir û felsefeya Rêber Apo bihîstibû. Berxwedana şervanan û gelên herêmê tesîreke zêde li ser min çêkir. Piştî ez tevlî bûm di hemleyên curbicur de min cih girt. Herî dawî ez li ser pêşniyara xwe derbasî qada Bendava Tişrînê bûm. Min berxwedana bi heybet a ciwanên Kurd û Ereb bi çavên xwe dît. Bêguman ev cesaret û îrade bi temamî bi saya Rêbertî û şehîdan ava bûye. Dema em di nav berxwedanê de bûn, me digot ‘Eger em şehîd jî bikevin, wê hevrêyên me yên sax mane, rêya me bişopînin û xwedî li destketiyên me derkevin.’ Divê mirov zanibe ku ti hêz nikare li hember vê baweriyê bisekine.”
Feysel destnîşan kir ku li gel berxwedana şervanên jin û mêr, hatina gelên herêmê ya Bendava Tişrînê bêhtir hêz dida wan û got, “Gotina şehîd Zehra ya ‘Em ji mirinê mezintir in’ û ya Bavê Teyar a ‘Em ji mirinê natirsin’ gotinên wê bi sedan salan weke dirûşmên, berxwedan û têkoşînê ji gelên bindest re bibin rehbera rêya diçe azadiyê. Di wê pêvajoyê de ez birîndar bûm. Bêguman dema min dît lingekî min çûye destpêkê bandor bûm. Paşê min got, ‘Bila canê min fedaî Rêbertî û hevalên şehîd be.’ Berdêla azadiyê giran e. Di oxira azadîyê de dibe ku em bibin gazî û şehîd jî bikevin. Her tişt ji bo em jiyanek bi rûmet wekhev ava bikin tê kirin. Rêber Apo jî dibêje, ‘Gazî şehîdên zindî ne.’ Hewce ye em weke hevalên gazî xwedî li gotinên Rêber Apo derkevin.”
BANGA RÊBER APO DUBARE TOVÊN AZADIYÊ ŞÎN KIR
Gaziyê şer Feysel Ebu bal kişand ser pêvajoya ku ji aliyê Rêber Apo ve hatî destpêkirin û got, “Rêber Apo Banga Aştî û Civaka Demokratîk kir. Ev bang ji bo Rojhilata Navîn û giştî cîhanê şansekî mezin e. Banga Rêber Apo tovên azadiyê careke din hêşîn kir. Weke şervan, gazî û gelên herêmê erka me ya esasî ew e, ji bo azadiya fizîkî ya Rêber Apo em bi rola xwe rabin. Tenê bi fikir û ramanên Rêber Apo gel dikarin xwe ji şer û pevçûnan biparêzin. Ez weke hevalekî ji pêkhateya Ereb dikarim bêjim ku şoreşa me şoreşeke mirovahiyê ye. Hemû nirxên bilind ên ji bo mirovbûnê di nav xwe de dihewîne.”
