Endama Navenda Lêkolînê ya Jineolojiyê nivîskar û rojnamevan Nagîhan Akarsel di 4’ê Cotmehê 2022’yan de li bajarê Silemeniyeyê ya Başûrê Kurdistanê hat qetilkirin. Nagîhan Akarsel di salvegera 3’yemîn a qetilkirina xwe de li ser gora xwe ya gundê Gulyazi ya navçeya Cîhanbeylî ya Konyayê hat bibîranîn.
Bîranîn ji bo cangoriyên azadî û demokrasiyê bi deqîqeyeke rêzgirtinê destpê kir. Di rêzgirtinê de dirûşmeyên, “Jin jiyan azadî” hat berzkirin.
Piştre qurnefîl li ser gora Nagîhan Akarsel hatin danîn. Endama Koordînasyona Jinan a Anatoliya Navîn a DEM Partiyê Zeynep Yalçin, da zanîn ku Akarsel bi 11 guleyan hatiye qetilkirin û got ku têkoşîna wê ji bo jinan sembola vejînê ye û nivîs û ramanên wê dê zindî bimînin.
Piştre jî Parlamentera DEM Partî ya Wanê Gulderen Varli axivî û bi lêv kir ku ew ê ala têkoşîna Nagîhan Akarsel bernedin û ev tişt gotin, “Jin bingeha jiyan û azadiyê ne. Hevrê Nagîhan bingeha vê têkoşînê ye. Ew kesek bû ku bi pênûsa xwe têkoşîna jinan a tarî ronî kir. Da fêmkirin ku têkoşîna azadiya jinan di azadkirina jiyanê de ye. Erê, tu kuştina jinan tesaduf nîne. Nagîhan dîroka jinan a tarî bi pênûsa xwe nivîsand. Wê gelek tişt ji me re hişt. Em soz didin wê: Em hezar carî spasdarê te ne ji bo ronîkirina me, ji bo ronîkirina civakê, ji bo rê li ber jinan bi têkoşîn û azadiyê vekirin.”
Nagîhan Akarsel li Edene û Enqere jî hate bîranîn.
