Stadyûma Şehîd Bawer Agir di destpêka sala 2019’an de ji aliyê endamê Rêveberiya Tevgera Ciwanên Şoreşger a Sûriyeyê Bawer Agir (Ahmet Akyuz) ve li bajarê Kobanê weke projeyek ciwanan hatibû destpêkirin.
Bawer Agir ji bajarê Amedê yê Bakurê Kurdistanê ye. Ew jî wekî bi hezaran ciwanên Kurd, li hemberî êrîşên çete û dagirkeran bi armanca parastina destkeftiyên şoreşê berê xwe dabû Rojavayê Kurdistanê-Bakur û Rojhilatê Suriyeyê. Li vir di xebatên Tevgera Ciwanên Şoreşger a Sûriyeyê de cihê xwe girt û weke rêveber xebat meşand.
Di çarçoveya xebatên ciwanan de bi pêşengiya Bawer Agir, di destpêka sala 2019’an de li bajarê Kobanê projeya avakirina stadyûma futbolê hat destpêkirin.
Heman salê roja 9’ê Cotmehê dewleta Tirk a dagirker û çeteyên wê li hemberî Girê Spî û Serêkaniyê êrîşên dagirkeriyê dan destpêkirin. Li hemberî êrîşan Bawer Agir jî tevlî eniya berxwedanê bû. 18’ê Cotmeha 2019’an di berxwedana bajarê Girê Spî de şehîd bû.
PROJE HAT TEMAMKIRIN
Piştî şehadeta Bawer Agir, Desteya Ciwan û Werzîşê ya Kantona Firatê xebatên projeyê domandin. Dihat plankirin ku stadyûm 2024’an were vekirin. Lê artêşa Tirk a dagirker, li gel binesaziya herêmê, ev proje jî carek bomberan kir. Lewma xebatên wê bi derengî ketin.
Di vê navberê de Tevgera Ciwanên Şoreşger a Sûriyeyê û Yekîtiya Jinên Ciwanan ji bo bîranîna Şehîd Bawer sala 2020’an Festîvala Çand, Huner û Sporê ya Şehîd Bawer da destpêkirin.
Desteya Ciwan û Werzîrê jî plankirin ku heta festîvala 6’emîn stadyûmê temam bike û ji xizmetê re veke.
Stadyûma ku navê şehîd Bawer Agir lê hatiye kirin, 11’ê Cotmeha 2025’an di roja yekemîn a festîvalê de hat vekirin.
STADYÛMA HERÎ MEZIN A HERÊMÊ YE
Li gorî agahiyên ku Hevseroka Desteya Ciwan û Werzîşê a Kantona Firatê Avaşîn Misto dane ANF’ê, ji bo stadyûmê milyonek dolar hatiye xerckirin. Dirêjahiya stadyûmê 107 metre, firehiya wê jî 70 metre ye. Di stadyûmê de 5 hezar kursî hatine danîn, yanî 5 hezar kes wê karibin bi awayekî rûniştî lîstikan temaşe bikin. Li stadyûmê cihên perwerdeya branşên wekî voleybol, bazdan, satranç, tenîs jî hatine çêkirin. Avaşîn Misto diyar kir ku stadyum di standartên cîhanê de hatiye çêkirin û stadyûma herî mezin a Bakûr û Rojhilatê Sûriyeyê ye.
‘ME XEYALA ŞEHÎD BAWER PÊK ANÎ’
Avaşîn Misto da zanîn ku ji ber êrîşên dewleta Tirk a dagirker temamkirina stadyûmê demek dirêj girtiye û got: “Êrîşên li ser binesaziya herêmê çêbûn. Dîsa di dema êrîşên li ser Tişrîn û Qereqozakê de jî ev der bibû hedef. Lewma demekê xebatên çêkirinê hatin sekinandin.”
Avaşîn Misto bi bîr xist ku xeyala şehîd Bawer vekirina stadyûmeke bi vî rengî ku dê xizmeta ciwanan bike bû û ew jî niha bi vekirina stadyûmê vê xeyalê pêk tînin. Avaşîn Misto diyar kir ku bi temamkirina projeyê bîranîna şehîd Bawer ku yek ji pêşengên ciwanan bû, jiyanî dikin û wê bi hezaran ciwan li ser rêya şehîdan bimeşin.
