Endamê Tîma Kurdistanî ya Rêxistina CPT a Emerîkî têkildarî dagirkeriya dewleta Tirk a li nav Başûrê Kurdistanê û talankirina daristanên herêmê daxuyaniyek weşand.
CPT ragihand ku artêşa Tirk çêkirina baregehên leşkerî yên li ser çiyayê Metîna, çêkirina rêyên di nav baregeh û navendên leşkerî yên li deverên Zap û Avaşînê li sînorê bajarokê Amêdiyê, her wiha wêrankirina daristan û birîna daran li herêma Zapê û birina wan ji bo Tirkiyeyê, berdewam dike.
Di daxuyaniyê de hate diyarkirin ku ji 1’ê Adarê heta 30’ê Hezîrana îsal artêşa Tirk 139 êriş û bombebaran li ser Herêma Kurdistanê pêk aniye.
Hate ragihandin ku heta niha jî niştecihên gundên Ber Garê û deverên Nihêlê jî nikarin biçin ser bax û zeviyên xwe.
CPT’yê di heman daxuyaniyê de destnîşan kir ku di meha Tebaxa îsal de dema gundiyên Guherzê ya devera Nihêle dixwestin biçin ser bax û zeviyên xwe, ji aliyê leşkerên Tirk ve zêdetirî saetê hatin binçavkirin.
Her wiha Tîma Kurdistanî ya Rêxistina CPT’ya Emerîkî da zanîn ku artêşa Tirk zêdetirî 50 xaniyên welatiyên sivîl ên li gundên Ber Garê bi temamî wêran kirine.
CPT’yê destnîşan kir ku artêşa Tirk ne tenê rêyan di navbera baregehên xwe yên leşkerî yên li Herêma Kurdistanê de çêdike, di heman demê de rêyan ji baregehên leşkerî ber bi nava gundan ve jî çêdike.
