Meşa endamên Konfederasyona Sendîkayên Kedkarên Kamûyê (KESK) ku ji bo vegerandina kedkarên giştî yên bi Biryarnameyên di Hukmê Zagonê de (KHK) ji kar hatibûn dûrxistin, di 13’ê Cotmehê de ji Amedê ber bi Enqereyê ve dabûn destpêkirin, bi dawî bû. KESK’iyan piştî ku bi nûnerên Partiya Wekhevî û Demokrasiyê ya Gelan (DEM Partî), Partiya Kedê (EMEP) û Partiya Gel a Komarê (CHP) re hevdîtin kirin, daxuyanî dan.
Gelek partiyên siyasî û rêxistinên civaka sivîl serdana KESK’iyên ku beriya daxuyaniya heyeta ku li parlamenê hevdîtin pêk anîn, li ber Bîrdariya Kankeran çalakiya rûniştinê li dar xistin. Hevserokê Giştî yê KESK’ê Ahmet Karagoz, li ser navê heyeta KESK’ê ya ku bi Hevseroka Giştî ya DEM Partiyê Tulay Hatîmogullari, Parlamentera EMEP’ê Sevda Karaca û Alîkara Serokê Giştî yê CHP’ê Gamze Taşcier re hevdîtin kiribû, axivî û da zanîn ku nûneran diyar kirine ku ew ê daxwazên dûrxistiyên KHK’yî roja sêşemê di civîna komê ya li parlamenê de bînin rojevê.
Karagoz got, “Bila neyê fikirîn ku ev kar îro li vir bi dawî dibe. Em sê xalan datînin dawiya vî karî. Dê dewama wê bê. Heta ku hemû hevalên me yên KESK’î li erkên xwe vegerin em ê vê têkoşînê bidomînin. Ji ber ku em bi aştî, demokrasî û kedê ve girêdayî ne. Heta ku em aştî û demokrasiyê neynin ser axa vî welatî, em ê dev ji vê têkoşînê bernedin.”
Piştî daxuyaniyê, KESK’iyên ku ji bajarên cuda hatibûn Enqereyê, bi çepik û tilîliyan hatin oxirkirin.
Ji aliyê din ve, KESK’ê ji bo kedkarên qamûyê yên bi KHK’yê hatine dûrxistin, li Edene, Êlih, Agirî û Antalyayê bi dirûşma “Em ê karê xwe paş de bistînin” çalakî li dar xistin. Di daxuyaniyan de hat bibîrxistin ku piştî 15’ê Tîrmehê herî kêm 125 hezar kes ji karê qamûyê hatine dûrxistin û wisa hat gotin: “Heke desthilatdarî behsa aştiya civakî dike, divê weke gava yekem hemû kedkarên qamûyê yên ku bi awayekî bêhiqûqî hatine îxrackirin, li karên wan vegerîne. Wekî KESK, em ê têkoşîna xwe bidomînin heta ku hemû hevalên me li karên xwe vegerin.”
