Meclisa Kombûna Jinan a Zenûbiya ya Kantona Tebqayê çalakiyek li pêşiya avahiya xwe ya li bajarê Tebqayê lidar xist. Nûnerên saziyên Rêveberiya Xweser, Weqfa Jinên Azadî, Navenda Lêkolînên Jineolojiyê û endamên kombûnê beşdar bûn.
Di çalakiyê de ji rêveberên Meclisa Kombûna Jinan a Zenûbiya ya Kantona Tebqayê Necah El Hisên axivî û got: “Dengê jinan dengê aştiyê ye. Beşdarbûna çalak a jinan nebe, Sûriyeya nû ava nabe. Silav ji giyanê şehîda aştiyê Hevrîn Xelef û tevahî jinên Sûriyeyî re ku ji bo welatekî adilane û demokratîk têk dikoşin.”
Piştre 5 deqe rêz ji bo şehîdên azadî û aştiyê hat girtin.
Ev çalakî di çarçoveya pêngava “Bi hevgirtina jinan em ê Sûriyeyeke azad, demokratîk û nenavendî ava bikin” de hat lidarxistin. Pêngavê di 12’ê Cotmehê de bi daxuyaniyeke hevbeş a Kongra Star û Kombûna Jinan a Zenûbiya dest pê kiribû.
Armanca pêngav ku li gorî 3 qonaxan hatiye birêxistinkirin, bi beşdariya jinan avakirina Sûriyeyeke pirrengî, demokratîk û nenavendî ye.
