Gerîlayên YJA Starê Viyan Avesta, Darsî Amed û Rojda Brûsk bi wesîleya salvegera 33’emîn a şehadeta ji fermandarên pêşeng ên PKK’ê Bêrîtan (Gulnaz Karataş) qala mîrateya berxwedanê ya şehîd Bêrîtan kirin.
Gerîlaya YJA Starê Darsî Amed diyar kir ku şehîd Bêrîtan li dijî mejiyê bi serweriya mêr xeta jinê diyar kiriye û got, “Hevala Bêrîtan nîşanî me da ku divê em çi qebûl nekin û em ji bo çi şer dikin. Berxwedana îro ya li rojavayê Zapê jî li ser xeta Bêrîtan dewam dike. Çalakî û sekna şehîd Bêrîtan, rê li ber têkoşîna me xist. Têkoşîna me ne tenê li hemberî dijmin e, di heman demê de li hemberî mejiyê bi serweriya mêr e. Xeta ku hevala Bêrîtan diyar kiriye xeteke îdeolojîk e; ne tenê berxwedaneke çekdarî ye. Armanc û hewldana me ji bo wê yekê ye ku li ser xeta hevala Bêrîtan jiyaneke nû ava bikin, li ser vê xetê kûr bibin û jinan hemûyan li ser vê bingehê temsîl bikin.
Hevala Bêrîtan bi xeta afirandî bi şênberî nîşanî me da ku divê em jiyana nû çawa bijîn, bi perspektîfên Rêber Apo re çawa bi xweza û heqîqetê re bibin yek. Gelek hevalên jin û mêr dan ser şopa xeta Bêrîtan; ji ber ku ev xet temsîla jiyanê dike. Bi esasî ev xet bersiva li pirsa divê çawa bijî ye. Em her tim dibêjin, baş e ku em xwedî îdeolojî û hevrêyên bi vî rengî yên pêşeng in. Ji ber vê yekê em ê heta dilopa dawî ya xwîna xwe teslîmiyetê qebûl nekin; li hemberî teslîmiyetê li her qadê têkoşîna xwe bilind bikin. Li ser xeta berxwedanê ya fermandar û pêşengên xwe em ê têkoşîna xwe dewam bikin.”
‘JI BO ARTÊŞBÛNA JINÊ GAVEKE DÎROKÎ HATE AVÊTIN’
Gerîlaya YJA Starê Rojda Brûsk bandora şehîd Bêrîtan a li ser tevgera jinê û mîrateya li pey xwe hiştiye nirxand û işaret bi rola xeta Bêrîtan a li ser artêşbûna jinê kir. Gerîla Rojda Brûsk destnîşan kir ku Bêrîtan bi çalakiya xwe ji bo artêşbûna jinê roleke dîrokî bi cih anî û got, “Di salvegera 33’emîn a şehadeta hevala Bêrîtan de em wê bi minetdarî bi bîr tînin, bi rêzdarî bejna xwe li ber bîranîna wê ditewînin. Şervanên weke hevala Bêrîtan li çar aliyên Kurdistanê sekna jinê afirandine. Sekna ku hevrê Bêrîtan li hemberî xiyanetê nîşan da, ji bo me pîvanek e. Hevala Bêrîtan di artêşbûna jinê d gaveke dîrokî avêt. Hem ji aliyê çalakiyê hem jî ji aliyê asta fermandariyê ve bû nûnera jin a Kurd a berxwedêr ku Rêbertî dixwaze biafirîne. Li gel ku şervaneke hîn salekê bûi li dijî hêzên komploger û xayin di jiyana azad de israr kir, xeta wê diyar kir.
Jiyana koletiyê ya ku sîstema bi serweriya mêr ferz dike red kir û got, ‘ez heme’. Xeta fedaî ya ku wê afirand ji bo me veguherî çandekê. Îro jî di artêşbûna jinê de xeta hevala Bêrîtan gelekî diyar e û bi bandor e. Em ji van hevrêyên pêşeng hînî têkoşîna xwe bûn. Mînak, hevalên Sara û Rûken li ser bingeha xeta şehîd Bêrîtan çalakiya fedaî kirin. Hevalên Erdal û Rojhat jî, hevalê Cûmalî jî bûn nûnerê vê xetê. Hevalê Cûmalî gotibû, ‘Li hemberî aqlê bi serweriya mêr mirov tenê bi aqlê jinê dikare li ser xeta azadiyê bi ser bikevin’. Em artêşbûna jinê deyndarê hevrêyên xwe ne ku gihandin vê astê û li tevahiya cîhanê dan nasîn. Em careke din hevala Bêrîtan bi hurmet bi bîr tînin. Ji bo pêkanîna xewn û xeyalên hevrêyên xwe yên şehîd, çi pêwîst be em ê wê bikin.”
‘BÛ WESÎLE KU BI HEZARAN JIN XETA AZADIYÊ YA JINÊ JI XWE RE BIKIN ESAS’
Gerîla Viyan Avesta jî bi bîranîna şehîd Bêrîtan dest bi axaftinê kir û bal kişand ser rola Bêrîtan a ji bo avakirina nasnameya jinên Kurd. Viyan Avesta got, “Beriya her tiştî fermandara me ya hêja hevala Bêrîtan û hemû hevrêyên di vê oxirê de berdêl dan, şehîd bûn bi bîr tînim, bi hurmet bejna xwe li ber bîranîna wan ditewînim. Berxwedan û nasnameya ku hevala Bêrîtan afirand bû bingeha têkoşîna me. Li hemberî xayinan ti carî serî netewand, li dijî êrîşan berxwedêriya me û israra me ya di azadiyê de nîşan da. Hevala Bêrîtan destpêkê çeka xwe şikand û piştre jî xwe ji zinêr avêt. Bi vê çalakiyê bû wesîle ku bi hezaran jin xeta azadiyê ji xwe re bikin esas û di vê rêyê de bimeşin.
Çalakiya hevala Bêrîtan ji bo jinên Kurd nasnameyek, xetek diyar kir. Hînî me kir ku weke jin çawa dikarin bibin nîşaneya azadiyê. Têkiliya navbera şehîd Bêrîtan û Rêbertî jî gelekî xweser e. Dibe ku hevala Bêrîtan ti carî Rêbertî nedît, lê belê xwest romana wî binivîsîne. Di fikir de azad bû, di çalakiyê de zelal bû. Ji ber ve yekê teslîmî xiyanetê nebû û li ser xeta azadiyê meşiya. Lİ hemberî xiyanet û nokeran bêteredût got, ‘Ez teslîm nabim, ez azad im’. Em jî li ser rêya hevala Bêrîtan dixwazin xwe bigihînin nasnameya jin a azad. Li ser vê bingehê em ê xwedî li xeta Bêrîtan derkevin û di rêya azadiyê de timî israr bikin. Em hevala Bêrîtan careke din bi hurmet bi bîr tînin.”
