Serokê Giştî yê MHP’ê Devlet Bahçelî di Civîna Koma partiya xwe de ya hefteya derbasbûyî li gorî xwe pênaseya Elewîtiyê kir. Nerazîbûnên li hemberî vê yekê dewam dikin. Ji pîrên Ocaxa Sînemîlî Suleyman Deprem li ser mijarê ji ANF’ê re axivî û anî ziman ku beriya her tiştî dustûr û nêzîkatiya wan a bingehîn ew e ku bêyî lê binihêre bê ziman, ol, nijad û zayenda mirov çi ye, nêzîkatiya mirovî ji xwe re dikin esas.
Pîr Deprem pênaseya Serokê Giştî yê MHP’ê Devlet Bahçelî ya li ser Elewîtiyê û endamên ÎYÎ Partiyê yên ku dema dawî nijadperestiyê mezin dikin, rexne kir û got,, “Dema ku mirov bala xwe didin ser wan kesan ku bi navê Tirkîtiyê êrîşê dibin ser hemû nasnameyên neteweyî, dibînin ku ti ji wan Tirk jî nîne. Ti ji wan Misilman jî nînin. Yên ku ji ber hin neteweyan hatine peydakirin bi navê ‘Tirkbûnê’ vî welatî bi rê ve dibin. Dustûreke me ya bingehîn heye; Yên ku eslê xwe înkar bikin heramzade ne. Eger hewl didin ku çarenûsa hinekî din diyar bikin jî ev yek asîmîlasyon û polîtîkayeke tinekirinê ya bi zanebûn e.”
ÎMAMÊN BI KINCÊ PÎR, HEWL DIDIN XWE LI BER DILÊ WAN ŞÎRÎN BIKIN
Pîr Deprem diyar kir ku bêyî hesabê komkujiyên li hemberî Elewiyan ên weke Sêwas, Mereş û Çorûmê bê dayin, bêyî hesabê êşên berê bê dayin bi destê hin kesên ji aliyê dewletê ve hatine wezîfedarkirin, bi komkirina ‘îmamên bi kincê pîr’ hewl didin xwe li ber dilê civaka Elewî şîrîn bikin û ev hewldan rexne kir. Pîr Deprem ragihand ku ev nêzîkatî Elewîtiyê bêqîmet dike, dejenere dike, ji cewhera xwe dûr dixîne û got, “Ev yek ne tenê li hemberî Elewiyan her wiha li dijî Kurdan, li dijî hemû mirovên ku ji nirxên jiyana hevpar û wekheviyê bawer dikin êrîşek e. Nenaskirina cemxaneyê di statuya îbadetxaneyê de nîşan dide ku heman mejî hîn jî dewam dike. Elewî endamên baweriyeke welê ne ku şîretan dike ku divê mirov zerarê nede mêşekê jî. Li hemberî baweriyeke bi vî rengî çima hîn jî ewqas zilm tê kirin û polîtîkaya înkarê tê meşandin.”
Pîr Suleyman Deprem diyar kir ku sîstem êdî pêwîstiyê pê nabîne ku bi hêzên fermî êrîşî Elewiyan bike, lê bi rêya ‘kesên noker ên ku Elewîtiyê pêşkêş dikin’ ên ji hundir amadekariya asîmîlasyona navxweyî dike.
Pîr Deprem bi bîr xist ku di dîroka qedîm a Elewîtiyê de rêxistiniyeke qanûnî nîne ku bi destûra dewletê hatiye avakirin û ev bang li civaka Elewî kir: “Eger Elewî cemxaneya Bahçelî ava kiriye ji xwe re weke amûrek ji bo erkana rê dibînin, şaşitiyê dikin. Tê wê wateyê ku teqez ji bo berjewendiyekê xwe nêzî wir dikin. Bila Elewî baş bifikirin û vê rewşê li ber çavan bigirin.”
