Gerîlayên YJA Starê Amed Botan û Sema Brûsk 25’ê Mijdarê Roja Têkoşînê ya Navneteweyî ya li dijî Tundiya li Jinê nirxandin.
Gerîlaya YJA Starê Amed Botan anî ziman ku guherîn û veguherîna îro li nava civakê pêk tê ji bo jinan xwedî wateyeke mezin e û diyar kir ku jinên ji aliyê sîstema bi serweriya mêr ve hatine kolekirin, li malê hatine asêkirin û ji hêza xwe bêpar hatine hiştin, êdî xwedî îrade ne. Gerîla Amed Botan destnîşan kir ku di bingeha vê pêşketina jinan de fikir û felsefeya Rêber Apo heye û got, “Bi komkujiyên li nava civakê û êrişên dagirkeriyê êriş li ser nirxên jinê têne kirin. Mejiyê bi serweriya mêr îro jî hebûna xwe li ser dijminatiya li jinê dewam dike.
Gelekî girîng e ku li hemberî tundiya li mêr têkoşîn bê meşandin, rêxistinî bê kirin. Lewma divê cîhan bibîne ku hêza jinê dikare çi bi ser bixîne. Bi fikrên Rêber Apo artêşa jinê hate afirandin. Jin çawa dikare şer bike, bi hêza xwe çawa dikare xwe bi rêxistin bike, ji aliyê aborî ve çawa dikare bibe xwedî gotin, îdeolojiya xwe çawa dikare bipejirîne, li her derê çawa dikare pêşengiyê bike? Rêber Apo nîşan da ku ev hemû dikarin bêne biserxistin. Em her tiştên ku sîstema hegemonîk li jinê qedexe kiriye bi fikrê Rêber Apo pêk tînin û bi vî rengî dixin meriyetê. Em niha li çiyê ne, weke jin û ciwanên Kurd vê jiyanê dewam dikin. Ev yek ji bo me hêza herî mezin e.
Weke jinên ciwan em hêza xwe hîn bêhtir nas dikin. Weke gerîlayên YJA Starê asta ku em îro gihîştine bi saya fikir û felsefeya Rêber Apo ye. Em hêza xwe ji Rêber Apo werdigirin, ji hevrêyên weke hevala Sara werdigirin. Hevala Sara û hevrêyên me yên din nîşan dan ku jin çawa dikarin têbikoşin, çawa dikarin ji xwe re xetekê diyar bikin. Em ê li ser şopa van hevalên xwe bimeşin û têbikoşin. Jin di xeta Apoyî de rastiyê dibînin û digihêjin cewhera xwe. Ev nirxên li nava tevgera azadiyê hatin afirandin bi saya bi hezaran hevrêyan bû ku canê xwe feda kirin.”
‘JIN HEMÛ DIVÊ LI HER QADÊ LI DIJÎ TUNDIYÊ TÊBIKOŞIN’
Gerîlaya YJA Starê Sema Brûsk jinên ku bi îradeyeke mezin li dijî tundiya li jinê têdikoşin silav kir û got, “Weke hêzên YJA Starê em dixwazin yekîtiya jinên cîhanê ava bikin. Divê em hêz, îrade û fikrê jinê li her qada jiyanê derxin holê. Em li çiyê di vê oxirê de têdikoşin. Em di wê baweriyê de ne ku jin wê fikrên Rêber Apo ji xwe re bikin esas û bi biryardarî têkoşînê dewam bikin. Her jin divê haya xwe ji hêz û îradeya xwe hebe. Yekîtiya jinan wê hêzeke mezin, berxwedaneke mezin biafirîne.
Divê em tundiya mêr a li hemberî jinê, çanda destavêtinê û komkujiyên li hemberî jinan ti carî qebûl nekin. Pêwîste em xwe bi rêxistin bikin, bibin hêz û komunên xwe ava bikin. Tenê bi vî rengî em dikarin li pêşiya tundiya li jinê û komkujiyên li hemberî jinan bibin asteng. Em li vê derê têdikoşin; jinên li cîhanê hemû divê li dijî tundiyê û komkujiyan li her qadê bibin yek û xwe biparêzin. Banga me li hemû jinan e; bibin yek, bibin hêzeke mezin û derkevin holê; azadiya xwe bi dest bixin, îradeya xwe dînin holê û komunên xwe ava bikin.”
