Çiyayên Kurdistanê yên ku bi salan e lê şerekî dijwar dimeşe, îro malûvaniya rojeke dîrokî kirin. Di serdemeke ku li gel Rêber Apo di çarçoveya çareseriya demokratîk a pirsgirêka Kurd de diyalog berdewam dikin de, dewleta Tirk di 24’ê Tîrmeha 2015’an de konsepta şerê topyekûn xist dewrê. Yekem hedefa bombebaranên balafirên şer ên ji Amedê bilind dibûn, bûn Qendîl. Li hemberî van êrîşên ku belav bûn seranserê Kurdistanê, Gerîlayên Azadiya Kurdistanê jî ev deh sal in berxwedaneke destanî nîşan dan.
GERÎLAYAN DI BIN TEVGERA KEŞFÊ DE PÊNGAVA DÎROKÎ AVÊTIN
Gerîlayên azadiyê yên ku li hemberî vî şerê ku komkujiya gelê Kurd hedef dikir berê xwe dan qadên cuda yên Bakurê Kurdistan, îro ji bo ku pêvajoya Aşitî û Civaka Demokratîk ya ku Rêber Apo înîsiyatîf stend û da despêkirin, bigihîje serkeftinê rêya bi sedan kîlometreyan li dû xwe hiştin û gihîştin Binarê Qendîlê. Rêveberiya Tevgera Azadiya Kurdistanê, di bin tevgera balafirên keşfê yên li asîmanên Qendîlê yên dewleta Tirk de ev pêngava dîrokî avêt.
ÇAPEMENIYA NETEWEYÎ Û YA NAVNETEWEYÎ LI CIHÊ WÊ ŞOPAND
Civîna çapemeniyê ya ku çavê her kesî li ser bû, ji aliyê BBC, Reuters, AFP, El Hadas, El Arabia, çapemeniya Başûrê Kurdistanê û kedkarên Çapemeniya Azad ve li cihê wê hate şopandin. Di çalakiya ku gerîlayan tedbîrên ewlehiyê bi awayekî zêde standibû de, destûr nehate dayîn ku telefon werin bikaranîn û cîhazên sînyalê qut dikin, hatin bikaranîn.
Rojnamevan, sibehê zû derbasî qada civîna çapemeniyê bûn û cihên xwe girtin. Gerîla, ji bintarên Qendîlê daketin Binarê Qendîlê û di pêşengtiya fermandarên xwe de derbasî qadê bûn. Di saet 09.00’an de jî gerîla bi pêşengtiya endamê Konseya Rêveber a KCK’ê Sabrî Ok, Endamê Konseya Fermandariya HPG’ê û Fermandarê Eyaleta Garzanê Devrîm Palû û Endama Fermandariya Eyaleta Serhedê ya YJA Starê Vejîn Dersîm derbasî qada civînê bûn û derketin pêşberî kamerayan.
PÊNGAVA DÎROKÎ BI ERÊKIRINA RÊBER APO HATE AVÊTIN
Di daxuyaniya ku bi erêkirina Rêber Apo pêngava dîrokî hate avêtin de peyamên girîng hatin dayîn; hem ji dewletê re hem jî ji gel re bang hate kirin. Rêveberiya Tevgera Azadiya Kurdistanê da zanîn ku ji bo destpêkirina qonaxa duyemîn û li hemberî provokasyonan hemû hêzên xwe yên li Bakurê Kurdistanê vekişandine. Dubare bi bîr xist ku di çarçoveya pêvajoya ku Rêber Apo daye destpêkirin de heya niha pêngavên mezin avêtine. Di daxuyaniyê de hate diyarkirin ku aktorê sereke yê pêvajoyê Rêber Apo ye û hate destnîşankirin ku divê tavilê şert û mercên jiyîn û xebitîna bi awayekî azad werin dabînkirin. Rêveberiya Tevgera Azadiyê da zanîn ku divê dewlet û desthilatdarî bersivê bide van pêngavên dîrokî û tavilê yasayên têkildarî entegrasyona demokratîk û azadiyê bixe meriyetê. Piştî civîna çapemeniyê ya bi Kurdî û Tirkî hate dayîn, bersiva pirsên rojnamevanan hatin dayîn. Piştî civînê koma gerîlayan, vegeriya qadên xwe. Endamê Konseya Rêveber a KCK’ê Sabrî Ok ku pêşengtiya koma gerîlayan kir, ji aliyê gerîlayan ve bi merasîma leşkerî hate oxirkirin.
A NIHA ÇAV LI SER DEWLETA TIRK IN KU WÊ BERSIVEKE ÇAWA BIDE!
Ji bo derbasbûna qonaxa duyemîn a pêvajoya Aşitî û Civaka Demokratîk li Binarê Qendîlê pêngaveke dîrokî hate avêtin. A niha çavê her kesî lê ye ku li hemberî vê pêngava Tevgera Azadiya Kurd wê dewleta Tirk bersiveke çawa bide… Bendewarî jî ew in ku azadiya fîzîkî ya Rêber Apo were dabînkirin, ji bo ku gerîla beşdarî siyaseta demokratîk bibin, yasayên têkildarî entegrasyona demokratîk û azadiyê werin derxistin û ji bo vê yekê jî ji bo PKK’ê yasayên taybet û resen werin derxistin.
