5’emîn Festîvala Fîlman a Navneteweyî ya Rojava di roja xwe ya 3’emîn de bi bernameyeke dewlemend a sînemayê dewam kir. Di Festîvalê de pêşandanên fîlman ên bi kalîte û semînerên taybet, hem li Navenda Çand û Hunerê ya Mihemed Şêxo û hem jî li Navenda Çand û Hunerê ya Demokratîk a Tevgera Mezopotamyayê li bajarê Qamîşloyê hatin pêşkêşkirin, fîlmçêker û kesên ku bi karûbarên çandî û civakî re eleqedar dibin li hev kom bûn.
Di roja 3’emîn de beşeke mezin ji hezkiriyên fîlman, derhêner, nivîskar, hunermend û xelkên herêmî beşdar bûn.
Çalakiyên festîvalê li Navenda Mihemed Şêxo bi semînereke bi sernavê “Şoreşa Sînemayê… Sînemaya Îranî” dest pê kir, ku qonaxên pêşketina sînemaya Îranî û bandora wê li ser şekildana şêwazên nû yên sînemaya realîst vekola. Piştî vê yekê kurtefîlma Kurdî “Ejnebî” û dû re jî belgefîlma “Hemû Çiya berhemdêr in” hate nîşandan.
Her wiha, fîlmê Sûriyeyî ” The Translator ” bala beşdaran kişand.
Fîlma “My Favorite Fabric” jî hate nîşandan, ku têkiliya jinekê bi beden û nasnameya xwe re di dema şer de nîşan dide, û bername bi fîlma dirêj “The Gas Man” ku xwedan aliyekî civakî û mirovî ye, bi dawî bû.
Li Navenda TEV-ÇAND`ê, roj bi pêşandana fîlma “Me xapand” a li ser şerê psîkolojîk û propagandaya şaş dest pê kir, piştir re fîlma kurt “Destmala Gulgulî”, dû re jî “Kopiya Resen” hat nîşandan. Di bernameyê de fîlma “Cûcekî kuştinê” jî hebû ku bandora tundûtûjiyê li ser civakan vedibêje her wiha fîlma “Piştî wê” jî hebû ku li ser bandorên trawmaya piştî şer e.
Belgefîlma “Jinên Serê Kaniyê” ji ber şahidî û vegotinên ku berxwedana jinan li hember êrîşên li ser bajêr belge dike, ji aliyê temaşevanan ve rastî eleqeyek mezin hat. Roj bi pêşandana fîlma dirêj “Bakûl” bi dawî bû.
