Di 15’ê Sibata 2026’an de li seranserê Kurdistanê û cîhanê gelê Kurd û gelên azadîxwaz komploya navnetewî ya dijî Rêber Apo şermezarkirin û daxwaza pêkanîna mafê hêviyê kirin. Civaka Êzidî, jî komployê şermezarkirin û daxwaza azadiya Rêber Apo kirin. Jinên Êzidî yên tevlî daxuyaniya çapemeniyê bûn, ji ANF’ê re axivîn.
Endama rêveberiya TAJÊ Zozan Simo diyar kir ew komploya 15’ê Sibatê ji fermanê jî girantir dibînin û wiha bertek nîşana komplogeran da: ‘‘Ji bo me jinên Êzidî, roja 15’ê Sibatê ji fermanê jî girantir e. Kesê ku ne tenê bi hawara Êzidiyan ve bi hawara dinyayê ve hat, mixabin niha dîlgirtiye. Ev 27 sale hîn jî girtiye. Li gorî qanûnên navnetewî dema ku mirovek 25 sal li girtîgehê bimîne, divê êdî guhertin di rewşa wî de çêbibe û bigihije mafê xwe. Hemû gelên bindest li benda azadiya Rêber Apo ne. Di dema fermanê de fikrê Rêber Apo bi hawara me ve hat. Raste bixwe di zîndanê de bû, lê şagirtên xwe ji bo rizgarkirina jinên Êzidî şand. Em ji bo wî çi bikin jî kêm e. Ji ber bi sedan şagirtên wî di ber me de şehîd bûn. Ji bo azadiya Rêber Apo çi ji me were xwestin, em amade ne bikin.’’
‘EM NAXWAZIN 15’Ê SIBATEKE DIN JÎ BÊYÎ RÊBER APO BIJÎN’
Zozan Simo, ji bo pêkanîna mafê hêviyê bang li saziyên navnetewî jî kir û axaftina xwe wiha bi dawî kir, ‘‘Em bang li saziyên navnetewî dikin ji bo azadiya Rêber Apo kar bikin. Eger Rêber Apo di nava me de ba niha dê rewşa me cûdatir bûya. Lê niha Êzidî hemû derbeder bûne û berbelavê her deverê bûne. Divê em xwedî li yên xwîn di ber me de rijandine derkevin. Bi saya wan, fermana bi ser me de hatiye li cîhanê tê zanîn. Hêvî dikim em salek din 15’ê Sibatê jiyan nekin û salek din jî heman xemê nejîn. Ev ji bo me jinên Êzidî gelek giran tê.’’
‘TENÊ RÊBER APO DIKARE ŞER RAWESTÎNE Û ARAMIYÊ BÎNE’
Endama TAJÊ ya Digûrê Rihan Xidir, jî Rêber Apo wekî Rêberê gelan pênase kir û wiha axiv, ‘‘Rêber Apo rêberê gelan û Kurd û Kurdistanê ye. Mirovek ku ewqase kes perwerde kiribe, lê niha ji mafê xwe bêpare! Ne naskirina mafê Rêber Apo, cihê şermezariyê ye. Eger ew vî mafê nasnekin jî, bawer dikim ew bi fikrê xwe yê bihêz mafê xwe bidest bixe. Hêzên navnetewî hemû gelan berdidin hev. Niha li her deverê şer e û aramî jî nîne. Tenê Rêber Apo dikare vî şerî rawestîne, ji bo wê jî divê azad bibe.’’
