Cesûr Cûdî (Mesût Yilmaz Denîz) ku sala 2006’an beşdarî nava refên Têkoşîna Azadiyê ya Kurdistanê bû, 29’ê Nîsana 2020’î li eyaleta Cîlo şehîd bû. Şehadeta wî ji aliyê Navenda Ragihandin û Çapemeniyê ya HPG’ê ve Îlona 2026’an hate eşkerekirin.
Endamê Konseya Rêveber a KCK’ê Mûstafa Karasû şehîd Cesûr Cûdî bi bîr anî ku di salên 2011-2012’an de li gel wî wezîfe kiribû û wiha axivî:
HEVALEKÎ GELEKÎ FEDAKAR Û JÊHATÎ BÛ
“Ez hevrê şehîd Cesûr bi hurmet bi bîr tînim. Hevrê Cesûr di pêvajoya 2011-2012’an de li gel min ma. Wê demê tevlîbûna herî zêde ji herêma Wanê dibû. Di salên 2008-2010’an de ji wê herêmê, ji Wanê gelek tevlîbûn çêbû. Hevalê Cesûr jî ji Westanê tevlî bûbû. Westan navçeyeke Wanê ye ku gelekî dûr e. Li gorî navçeyên din li qiraxê ye. Tevlîbûn jê heye lê belê ne weke Elbak û Qelqeliyê ye.
Hevalê Cesûr piştî ku tevlî bû cihê xwe di nava hêzên taybet de girt. Hevalekî gelekî fedakar, gelekî jêhatî bû. Bi taybetî karên pratîkî dikir. Nedigot ‘Ez ê kar bikim, an jî nekim’. Taybetmendiyeke wî ya welê hebû ku karên rêxistin dikir, karên hevalê xwe jî dikir. Hevalek bû ku jê dihate hezkirin. Durust bû, dilsozê partiyê bû. Aram bû, bêdeng bû, baldar bû. Ji bo karên îdeolojîk, belgeyên partiyê û hînbûnê gelekî eleqedar bû.
HEVALEK BÛ KU BI TEMAMÎ XWE DIDA TÊKOŞÎNÊ
Wê demê em li Garê diman. Du salan, dibe ku hîn zêdetir li gel me mabû. Piştre careke din vegeriya nava hêzên taybet, di sala 2020’î de şehîd bû. Herêma Wanê yek ji wan herêman bû ku di n ava têkoşînê de herî zêde şehîd da. Hevallê Cesûr î bi bandora wê herêmê tevlî nava têkoşînê bû. Hevalek bû ku bê navber xwe dida têkoşînê.
Hevalê Cesûr bi minet, bi hurmet bi bîr tînim. Em nikarin van hevalan ji bîr bikin. Gelek hevalên li gel man şehîd bûn, ji ber ku hinek ji wan du salan, hinek pênc salan, hinek jî hîn zêdetir dimînin. Em ê wî jî weke hevalekî gelekî xebatkar bi bîr bînin ku berê xwe dida her karî.”
BÛ YEK JI FERMANDARÊN NEMIR ÊN ZAGROSÊ
Cesûr Cûdî li navçeya Westan a Wanê ji dayik bû, di sala 2006’an de beşdarî nava refên gerîla bû. Di sala 2008’an de beşdarî nava Hêzên Taybet bû. Li gelek qadên gerîla kar kir. Di sala 2011’an de li gel endamê Konseya Rêveber a KCK’ê Mûstafa Karasû wezîfe kir, piştî ku du salan ev wezîfe kir, careke din li Hêzên Taybet vegeriya. Ji sala 2012’an heta 2020’an dema şehîd bû, li qadên herî zehmet ên Zagrosê têkoşîna gerîla meşand. Herî dawî li nava rêveberiya eyaleta Cîloyê cih girt. Bû yek ji fermandarên nemir ê Zagrosê.
Navenda Ragihandin û Çapemeniyê ya HPG’ê nasnameya gerîlayên di demên cuda de şehîd bûn mehên Tebax û Îlonê eşkere kir. Li her devera Bakurê Kurdistanê bi taziyeyên giştî xwedî li şehîdan hate derketin, bi şîna hevpar lehengên têkoşîna azadiyê hatin bîranîn. Di nava gerîlayên ku meha Îlonê şehadeta wan hate eşkerekirin şehîd Cesûr Cûdî jî hebû.
