Înîsiyatîfa Pêwîstiya min bi Aştiyê li dijî komkujiya jinan li Kolana Hunerê ya li Wanê daxuyaniyek da.
Di daxuyaniyê de pankarta bi nivîsa “Rojîn, Gulistan, Rojwelat, Îpek. Bila tundiya mêr a bi unîforma û necezakirin bi dawî bibe” hate hildan. Nûnerên gelek rêxistinên jinan û şêniyên herêmê beşdarî daxuyaniyê bûn.
Kurdiya daxuyaniyê ji aliyê aktîvîsta TJA’yê Muzeyyen Tûran, Tirkiya wê jî ji aliyê Nîmet Tanrikûlû ve hate xwendin.
Di daxuyaniyê de hate bibîrxistin ku bersûcê dosya Îpek Er çawişê pisporê Mûsa Orhan beraat kiriye û ev yek hate şermezarkirin.
Hate ragihandin ku parastina mafê jiyanê yê jinan û pêşîgirtina li tundiyê di bin berpirsyariya dewletê de ye û hate destnîşankirin ku mirina jinan nabe ku weke “mirina bi guman” bê qeydkirin.
Di daxuyaniyê de hate gotin, ku li gorî daneyên Baroya Wanê, di navbera Çileya 2024 û Îlona 2025’an de di çarçoveya 27 sûcên cuda ed 2 hezar û 299 jin û zarok hatin mexdûrkirin. Her wiha li rêveçûna lêpirsîna têkildarî mirina Rojîn Kabaîş hate pirsîn.
Di daxuyaniyê de ev daxwaz hatin kirin:
“Dosyayên têkildarî jinên winda û mirina bi guman a jinan careke din û bi bandor bê lêkolîn,
Rêxistinên jinan di her asta pêvajoyê de cih bigirin û weke mudaxîl beşdarî dadgehan bibin,
Dawî li sîstema cerdevaniyê, rejîma qeyûm û polîtîkayên ewlekariyê yên mîlîtarîst bê anîn,
Torên sûc ên ku jin û ciwanan tevlî şebekeyên sûc ên zayendî û narkotîkê dikin; têkiliyên gengaz ên wezîfedarên cemaweriyê û hêzên ewlekariyê yên bi wan tevnan re bê lêkolîn.
Înîsiyatîfê got, “Ji bo azadiya jinê em dibêjin bes e ji polîtîkayên şerê taybet û tundiya mêr-dewletê re.”
