Hêzên ser bi PDK’ê bi darê zorê xelkê gundê Lacan ê ser bi Hewlêrê ku piraniya xwe ji eşîreta Herkî ne, ji gundê wan derxistin. Xelkê gund doh bi şev li derve şeva xwe derbas kirin.
Li gor agahiyan, şêniyên gundê Lacan îro li derdora gundê xwe dest bi danîna konan kirine. Welatî daxwaza vekişîna hêzên PDK’ê ji nava gund û derdora wê, her wiha daxwaza berdana kesên hatine binçavkirin dikin.
Roja 29’ê Mijdarê xelkê gundê Lacan çalakiyek derxistin û xwestin ciwanên wan jî li bîra neftê ya petrolê ya Lanaz werin tayînkirin. Xelkê gund li ser rê çalakî derxistibû û rêya bîra petrolê girtibû. Piştre çekdarên PDK’ê bi guleyan êrişî gundiyan kirin û di encama êrişa çekdarên PDK’ê de, şufêrekî barhilgirê ku xelkê Kerkûkê bû jiyana xwe ji dest da û 12 kes jî birîndar bûn. Hejmarek ji welatiyan jî hatin binçavkirin.
Ji bo piştgiriya xelkê gundê Lacan, şeva borî li navçeya Xebat a ser bi Hewlêrê welatiyan xwepêşandan lidarxistin, PDK’ê jî hêzek zêde bi çekên giran ve şand navçeyê.
