Komê xwest, li ber Deriyê Çankayayê yê Meclîsê daxuyaniyê bide çapemeniyê, lê belê ji ber ku polîsan nehiştin, daxuyanî li ber Peykerê Madenkaran da.
Di çalakiyê de dirûşmên “Komkujiya Elewiyan a li Sûriyeyê rawestînin”, “Gelê Elewî bi tenê nîne” û “Na ji komkujiyê re” hatin qîrîn.
Parlamenterên DEM Partiyê Ayten Kordû, Perîhan Koca û Celal Firat jî piştgirî dan daxuyaniyê.
Rojnamevan û pisporê Rojhilata Navîn Mûsa Ozûgûrlû anî ziman ku êrişên li ser Elewiyan zêde bûne û bang li civaka Tirkiyeyê û navneteweyî kir ku dest li rewşê werdin. Ozûgûrlû diyar kir ku eger Tirkiye bixwaze dikare bi telefonekê vê komkujiyê bisekinîne.
QIRKIRINA BI RÊK Û PÊK
Serokê Komeleya Piştevaniya bi Elewiyan re ya Gelê Ereb Hamît Karaogûllarindan anî ziman ku êrişên li Sûriyeyê êdî gihîştine asta qirkirina bi rêk û pêk a li hemberî Elewiyan.
Lewma bang kir ku dawî li van kiryarên li dijî mirovahiyê bê anîn, hesab ji kujeran bê pirsîn û mexdûr bêne parastin.
Parlamenterê DEM Partiyê Celal Firat jî got, “Berpiryarê van komkujiyan ew kes in ku Colanî li qesra xwe pêşwazî kirin. Divê rayedar li hemberî komkujiyê bêdeng nemînin. Ev komkujî divê êdî raweste. Em bang li Wezîrê Karên Derve Hakan Fîdan dikin ku heyetek ji parlamenteran bişîne Sûriyeyê. Eger komîsyoneke bi vî rengî neçe weke DEM Partî em amade ne biçin.”
Piştî daxuyaniyê kom kete meclîsê, ji bo bi partiyên siyasî re hevdîtinê bike.
