Nerazîbûna parêzer, ji aliyê dadgeha înfazê ve bi hinceta ku “poşmanî nîşan nedaye” û “girêdana xwe ya rêxistinî didomîne” hate redkirin.
Mafê berdana bi şert a Mehmet Saît Yildirim, girtiyê nexweş ê giran ku 31 sal in li Girtîgeha Girtî ya Tîpa F a Buca Kırıklar a Îzmîrê tê ragirtin, careke din hate astengkirin. Diviyabû Yildirim di 27’ê Sibatê de bihata berdan, lê belê di civîna destpêkê ya Lijneya Îdare û Çavdêriyê ya di 18’ê Sibatê de, bi hinceta ku “ne bi rewşeke baş e” û “poşmanî nîşan nedaye”, berdana wî heta 27’ê Mijdarê hatibû taloqkirin.
Di civîna duyemîn a IGK’ê ya 25’ê Mijdarê de jî nirxandinên bi vî rengî hatin kirin û berdana Yildirim cara duyemîn 9 meh hate taloqkirin. Bi vî awayî dîroka berdana Yildirim heta 27’ê Tebaxa 2026’an hate dirêjkirin.
Li gorî agahiyên ku parêzerê Yildirim Fatma Demirer parve kir, ji bo astengkirina berdana bi şert, îdiayên “girêdana wî ya bi rêxistinê re qut nebûye, malbata xwe tevî rêxistinê dike” û karanîna gotinên Seyît Riza yên li ser sêpaya darvekirinê ji aliyê Yildirim ve weke hincet hatin nîşandan. Demirer, li dijî van pêkanînên kêfî serî li 1’emîn Dadgeha Înfazê ya Îzmîrê dabû.
ÎTÎRAZ HATE REDKIRIN
Dadgeha înfazê îtîraz red kir û got: “Di nirxandina li ser hikumxwar de; hatiye dîtin ku her servîsekê cuda cuda lêkolîn kiriye, van lêkolînan bi awayekî bêalî û li gorî usûl û zagonê pêk hatine, ji tespîtên hatine kirin tê fêmkirin ku hikumxwar poşman nebûye û girêdana wî ya rêxistinî didome, û yeqinî pê anîne ku eger bi şert bê berdan, dibe ku berê xwe bide heman tawan.”
Dadgehê, bi angaşta biryara IGK’ê ya di 25.11.2025’an de li gorî usûl û zagonê ye, giliyê îtîraza Yildirim hate redkirin.
