Biryara domandina girtina Hevşaredarê Colemêrgê Mehmet Siddik Akiş ê ku bi darbeya qeyûmê peywira wî hatibû desteserkirin û rehîn tê girtin li Colemêrgê hat protestokirin. Gel piştî biryarê li ber dadgehê kom bû û bi berzkirina dirûşmeya “Şaredar Siddik rûmeta me ye” nerazîbûn nîşan dan.
Parlamenterê DEM Partiyê Onûr Duşunmez li ber adliyeyê axivî û diyar kir ku dosyaya li dijî Akiş hatiye vekirin ji destpêkê ve bi armancên siyasî hatiye amadekirin û got: “Ji ber ku dosya siyasî ye, şaredar Sidik jî parastina siyasî kir. Ew ji bo demokratîkbûna vî welatî û geşbûna aştî û civaka demokratîk axivî.”
Duşunmez anî ziman ku tevî hemû astengiyan jî Akiş di hilbijartinan de bi ser ket û wekî hevşaredarekî ku îradeya gel temsîl dike dest bi peywirê kir. Parlamenter Duşunmez bi bîr xist ku wan berê jî gotibû ku ev dosya ne hiqûqî ye û rê li ber tayînkirina qeyûm vekiriye û wiha domand: “Heta dadgeha îstînafê jî bi şandina dosyayê ji dadgeha herêmî re nbê hiqûqiya wê danî holê. Biryara ku wê demê hatibû dayîn parçeyek plana têkbirina gelê Kurd û siyaseta wê bû.”
Duşunmez anî ziman ku di demeke ku li welat rewşa demokratîk derketiye holê de pêkanînên bi vî rengî nayên qebûlkirin.
Duşunmez destnîşan kir ku Akiş bêyî ku paşve gav bavêje têkoşîna xwe ya ji bo civaka demokratîk didomîne. Duşunmez diyar kir ku îradeya civakî zû yan dereng wê vegere û wiha bi dawî kir: “Em li ser piyan in. Bê guman, rojekê îradeya me wê li van kolanan xuya bibe û zîhniyeta desteser wê ji holê rabe. Divê demildest dev ji vê biryara siyasî berdin.”
